Жил бүрийн наймдугаар сарын 12-ныг “Анхдагч илгээлтийн эздийн өдөр” болгон орон нутгийн хэмжээнд тэмдэглэн өнгөрүүлэх тухай шийдвэрийг аймгийн ИТХ-ын 2016 оны 63 дугаар тогтоолоор баталсан билээ. Гурав дахь удаагаа эрдэнэтчүүд Зууны манлай бүтээн байгуулалт Эрдэнэт хот, дэлхийн шилдэг зэс хайлуулах үйлдвэрийн нэг “Эрдэнэт”-ийг бүтээн байгуулсан анхдагч, илгээлтийн эздийнхээ өдрийг өргөн дэлгэр тэмдэглэсэн юм. Эрдэнэт хотын байшин бүрийн тоосгонд, “Эрдэнэт” үйлдвэрийн машин механизмын эрэг шураг бүрт анхдагч, илгээлтийн эздийн залуу, халуун нас тэдний хөлс хүч шингэсэн байдаг. Тиймээс аймаг, орон нутгийн зүгээс анхдагч, илгээлтийн эздийнхээ түүхэн алдрыг мөнхжүүлэх, тэдэнд хүндэтгэл үзүүлэх зорилгоор жил бүрийн наймдугаар сарын 12-нд тэмдэглэлт өдрийг баяр ёслолын байдалтай тэмдэглэн өнгөрүүлдэг. Аймгийн Засаг дарга Д.Батлутын мөрийн хөтөлбөрт туссаны дагуу аймгийн ЗДТГ-аас “Анхдагч” дэд хөтөлбөрийг боловсруулж тэр хүрээндээ энэ удаагийн өдөрлөгийг зохион байгуулав.  Өдөрлөгт УИХ-ын гишүүн О.Баасанхүү, аймгийн Засаг даргын орлогч А.Түвшинжаргал, аймгийн ИТХ-ын Ажлын албаны дарга Д.Эрдэнэцэцэг, Баян-Өндөр сумын Засаг дарга С.Ганцогт нарын албаны хүмүүс оролцов. Мөн эх орны өнцөг булан бүрээс цугласан 400 гаруй ахмадууд, анхдагч илгээлтийн эзэд Жаргалант сумын төвд хуран чууллаа. Энэ үеэр урлагийн тоглолт, урлаг, спортын уралдаан тэмцээн болов. [sgmb id="1"]