Өвөлжилтийн бэлтгэл ажлын хүрээнд 2018-2019 оны өвөл эрдэнэтчүүдийн махны хэрэгцээнд зориулж нөөцийн мах бэлтгэлийн ажил эхэлсэн талаар холбогдох албаныхан аймгийн ИТХ-ын Тэргүүлэгчдийн хуралдаанд мэдээлэл хийлээ.  “Мах маркет” ХХК аймгийн нөөцөд 1000 тонн мах нөөцлөх аж. Мөн “Мон гема” ХХК 500 тонн мах нөөцлөх юм байна. Аймгийн хэмжээнд үйл ажиллагаа явуулдаг махны үйлдвэрүүд өвөлжилтийн бэлтгэл ажлын хүрээнд нөөцийн мах бэлтгэж байгаа ч үүнийхээ хажуугаар гадаад улс орон руу мах экспортонд гаргахаар ажиллаж байна. Тухайлбал, “Жаргалант” мах боловсруулах үйлдвэр 1000 тонн адууны мах БНХАУ руу гаргах бол “Мах маркет” зэрэг компани Лалын Бүгд найрамдах Иран улс руу 30 гаруй тонн хонины мах гаргана гэж албаныхан Тэргүүлэгчдэд дуулгалаа. Аймгийн ИТХ-ын Тэргүүлэгчдээс өвөлжилтийн бэлтгэл ажлын явцтай танилцаад “Ажил хэвийн хэмжээнд сайн явж байна” гэж дүгнэлээ. Үүний сацуу Баян-Өндөр, Жаргалант сумын болон аймгийн нөөцийн өвсний бэлтгэлийн тал дээр тодорхой зөвлөгөө өгсөн юм. Засгийн газраас сум бүрийг 100 тонн өвс, 20-30 тонн хүчит тэжээлийн нөөц тусгайлан бэлтгэхийг үүрэг болгосны дагуу анхаарахыг  Тэргүүлэгчид үүрэг болгов. [sgmb id="1"][sgmb id="1"]