2018-2019 оны хичээлийн жилд Орхон аймгийн ерөнхий боловсролын 24 сургуульд 20 мянга, 34 цэцэрлэгт 8800 хүүхэд сурна. Нэгдүгээр ангид 2174 хүүхэд элсэн оржээ.Хичээлийн шинэ жилийн эхний өдрөөс л багш нар гэрийн даалгавар өгч сурагч, эцэг эхчүүд гэрийн даалгавар хийх тухайд их бага гэлтгүй асуудал тулгарч байдаг. Зарим нэг багш нарын хувьд 3-4 хуудас хуулан бичиг хийлгэх, хоёр нүүр тоо бодуулах зэрэг нь хүүхдэд сайн гэж үзэж түүндээ итгэн гэрийн даалгавраар харин ч нэг сурагчдыг дарах шиг болдог. Тэгвэл энэ асуудалд Мэргэжлийн хяналтын ерөнхий газраас судалгаа хийсний үндсэн дээр зөвлөмж гаргажээ. МХЕГ-аас сурагчдад өгөх нэг өдрийн гэрийн даалгаврын хэмжээ, ачааллыг сургалтын агуулга, сурагчдын нас, бие, хөгжлийн онцлогт тохируулан өгөх зөвлөмж боловсруулсан байна. Зөвлөмжөөс харвал нэгдүгээр ангийн сурагчийн гэрийн даалгавар нэг цагаас хэтрэхгүй байх ёстой гэнэ. Харин II-III ангийн сурагч 1.5 цаг, IV-V ангийн сурагч хоёр цаг, дунд ангийн сурагч 2.5-3 цаг, ахлах ангийн сурагчийн гэрийн даалгавар 3.5 цагаас ихгүй байх шаардлагатай аж. [sgmb id="1"]