Сонгуулийн ерөнхий хорооноос “Орхон аймгийн ИТХ-ын дахин сонгуулийн тухай” гэсэн гарчигтай албан бичгийг энэ сарын 12-ны өдөр Шүүхийн шийдвэр гүйцэтгэх Ерөнхий газрын дарга Ц.Амгаланбаярын нэр дээр ирүүлсэн байна. Энэ албан бичгээс харвал аймгийн ИТХ-ын сонгуулийг дахин явуулахгүй, явуулна  гэж эрх баригч МАН, сөрөг хүчин болох АН-ынхан төдийгүй иргэдийн хувьд  эргэлзээ төрүүлсэн асуудалд эцсийн цэг тавьжээ. Сонгуулийн ерөнхий хорооноос Шүүхийн шийдвэр гүйцэтгэх ерөнхий газрын дарга Ц.Амгаланбаярт Орхон аймгийн ИТХ-ын сонгуулийг дахин зохион байгуулж явуулах, шүүхийн шийдвэр гүйцэтгэх ажиллагааг хуульд заасан бүрэн эрхийнхээ хүрээнд хэрэгжүүлэхийг даалгасан байна. Ингэснээр манай аймгийн ИТХ-ын дахин сонгууль Шүүхийн шийдвэрийн хүрээнд, шүүхийн шийдвэр гүйцэтгэлээр явагдахаар болжээ. Сонгуулийн хорооноос ирсэн албан бичгээс харвал, Улсын Дээд шүүхийн хяналтын шатны шүүхийн 2017 оны 9 дүгээр сарын 20-ны өдрийн 302 дугаар тогтоолд “Орхон аймгийн ИТХ-ын сонгуулийг Дахин товлон зарлаж, Дахин сонгууль зохион байгуулж, явуулахыг Орхон аймгийн сонгуулийн хороонд.... даалгахыг хүссэн нэхэмжлэлийг бүхэлд нь хангасугай” гэж дурдсан байна.  Сонгуулийн ерөнхий хороо 2017 оны аравдугаар сарын 11-ний өдрийн хуралдаанаараа дээрх 302 тоот тогтоолтой танилцаад “... хяналтын шатны шүүхийн шийдвэрт заасан үйл ажиллагааг зохион байгуулахыг ” аймгийн Сонгуулийн хороонд даалгаж байжээ. Улмаар Сонгуулийн ерөнхий хорооны 2016 оны 21 дүгээр тогтоолоор байгуулагдсан Г.Батдэлгэр даргатай, М.Жанболат нарийн бичгийн даргатай Орхон аймгийн Сонгуулийн хороог татан буулгаагүй гэж үзсэн тухай Сонгуулийн ерөнхий хорооны 2017 оны 10 дугаар сарын 12-ны өдрийн 348 дугаар албан бичгээр аймгийн ИТХ-ын Тэргүүлэгчдэд мэдэгдсэнийг ч Шүүхийн шийдвэр гүйцэтгэх Ерөнхий газрынханд дуулгасан байх юм. Өнөөдөр Монгол улсад мөрдөгдөж буй хууль тогтоомжоор бол Улсын дээд шүүхийн хяналтын шатны шийдвэр эцсийнх байдаг. Энэхүү эцсийн шийдвэрийг төрийн байгууллага биелүүлэх, хүлээн авах үүрэгтэй. Эс биелүүлбэл, эс зөвшөөрвөл Шүүхийн шийдвэр гүйцэтгэлийн журмаар асуудлыг шийддэг. Энэ талаас нь харвал Орхон аймгийн ИТХ-ын дахин сонгууль Шүүхийн шийдвэрээр, шүүхийн шийдвэр гүйцэтгэлийн шурамаар явагдахаар болж байна. 2016 оны зургаадугаар сарын 26-нд болсон орон нутгийн сонгуулийн маргаашнаас л эхэлсэн гэж болох Дахин сонгуулийн тухай яриа ийнхүү эцэслэгдэж, Шүүхийн шийдвэрийнхэн дахин сонгуулийг зохион байгуулахаар болж байна. [sgmb id="1"]