Аймгийн ИТХ-ын Тэргүүлэгчдийн хуралдаан энэ долоо хоногт хуралдсан. Энэ үеэр аймгийн ИТХ-ын дарга П.Пүрэвлхагва: ”2018-2022 онд Орхон аймгийн гэмт хэрэг, зөрчлөөс урьдчилан сэргийлэх, хэв журам, сахилга хариуцлагыг сайжруулах талаар баримтлах том бодлого яриад, том төсөв тавиад оруулаад ирсэн байна.  Энэхүү бодлогыг хэрэгжүүлэхийн тулд “Хөнжлийнхөө хэрээр хөлөө жийж”, байгаа төсөвтөө тохируулаад, чанартай ажиллах”-ыг санууллаа. Гэмт хэргээс урьдчилан сэргийлэх зохицуулах зөвлөлийн төсвийн дийлэнх хувийг манай аймагт буурахгүй гэмт хэргүүд дээр зарцуулдаг. Мөн энэ бодлого дээр ч ялгаагүй Орхон аймагт жил бүр буурахгүй байгаа согтуугаар үйлдсэн гэмт хэрэг, үүнийг дагаад гардаг замын осол, мансууруулах бодистой холбоотой  гэмт хэргүүдийг бууруулахад түлхүү зарцуулахыг анхааруулсан юм. “Орхон аймгийн хэмжээнд 2022 он хүртэл гэмт хэргээс урьдчилан сэргийлж, хэв журмыг сайжруулах хөтөлбөрийн удирдлага, зохион байгуулалтыг хэн хариуцах нь тодорхойгүй. Гэмт хэргээс урьдчилан сэргийлэх ажлыг зохицуулах зөвлөл хариуцахгүй, харин хяналт тавина. Аймгийн Хууль, эрх зүйн хэлтэс хөтөлбөрийг бүрэн хариуцаж, удирдлага зохион байгуулалтаар хангаж ажиллах ёстой” аймгийн ИТХ-ын дарга П.Пүрэвлхагва тайлбар хийлээ. Дээрх өөрчлөлтийг тогтоолын төсөл дээр оруулснаар 2018-2022 он хүртэл хэрэгжүүлэх бодлогын баримт бичгийг баталсан юм.