Төрийн албан хаагчид, өндөр настан, хөгжлийн бэрхшээлтэй иргэд, залуу гэр бүлд зориулан түрээсийн орон сууц олгох ажлыг Монгол улсын Засгийн газраас Түрээсийн орон сууц эзэмших журмаар зохицуулж байна. Манай аймагт хоёр засгийн нүүр дамнан хэрэгжиж байгаа төрийн мэдлийн 9 давхар бүхий 315 айлын орон сууцны барилгын ажлыг Барилга хот байгуулалтын яамны захиалгаар үргэлжлүүлэн улсын төсвөөр барьж байна. Энэ орон сууцыг иргэдэд ямар хэлбэрээр олгох вэ гэдэг нь одоогоор шийдэгдээгүй. Учир нь Төрийн орон сууцны санхүүжилтээр хэрэгжүүлж байгаа энэ барилгыг Орхон аймагт гэрээ байгуулан хүлээлгэж өгөөгүй байна. Иймээс манай аймаг захиалагчийн хяналт тавих боломжгүй. Мөн түрээсийн орон сууцаар иргэдэд олгох уу эсвэл орон нутгийн өмчид шилжүүлэх үү гэдэг нь гэрээ байгуулсаны дараа эцэслэн шийдэгдэнэ. Төр хөрөнгөө гаргаж бариад дуусах дөхөж байгаа энэ барилгад инженерийн шугам сүлжээний төсвийг яаж шийдэх вэ гэдгийг одоог хүртэл тогтоогүй байна. Барилгын ажлын явцаар ашиглалтанд орох хугацааг энэ оны аравдугаар сарын 30-нд гэж заасан байгаа ч хугацаандаа дуусах нь эргэлзээтэй, ус, дулааны холбох зардлыг шийдээгүй байгаа аж. Төрийн орон сууцны корпорацийн орон сууцны байрыг аймагт хүлээлгэн өгч гэрээ байгуулснаар Орхон аймаг захиалагчийн хувьд хяналт тавих эрх үүснэ. Мөн Засгийн газраас түрээсийн хэлбэрээр олгох уу гэдгийг шийдэх юм байна. [sgmb id="1"]