Аймгийн Засаг даргын дэд бүтэц, Хот байгуулалт хариуцсан орлогч С.Батжаргал “Эрдэнэт ус” ОНӨХК-д ажиллав. Энэ үеэр  тус компаниас ажлын хэсэг гарч гарч айлуудаар явж хэмжилт хийсэн, шаардлагатай зарим айлуудад газар дээр нь гомдлыг барагдуулж ажилласан тухай мэдээллийг сонсож, цаашид айл өрхүүдэд очиж буй дулааны хэмийг нэмэгдүүлэх талаар ярилцаж, чиглэл өглөө. Ингээд мэргэжлийн байгууллагын санал дүгнэлтийг үндэслэн “Диспетчерийн үндэсний төв”-д “ЭДЦС” ТӨХК-иас Эрдэнэт хотын дулааны сүлжээнд нийлүүлэгдэж буй дулааны хэмийг нэмэгдүүлэх талаар Орхон аймгийн Засаг даргаас хүсэлт хүргүүлэх болов. “Эрдэнэт-Ус” ОНӨХК-ийн инженерүүдийн үзэж буйгаар 40 жилийн турш ашиглагдсан дулаан дамжуулах шугам сүлжээ, ган хоолойнууд хуучирч муудсан, зарим газартаа диаметр нь нарийссан, ашиглалтад ороод олон жил болсон барилга байшингуудын дулаан алдагдал нэмэгдэж байгаа, айл өрх, орц подвалийн хаалга цонхоор дулааны алдагдал их.  Иргэд дур мэдэн тагт сунгах, нийтийн орон сууцанд өргөтгөл хийхдээ шугам, хоолой, халаах хэрэгслийн хийц элементийг дур мэдэн өөрчилдөг зэргээс үүдэн бусад айл өрхүүдийн халаалтад сөргөөр нөлөөлж байна гэж дүгнэж байна. Иргэдийн дунд байдаг нэг ташаа ойлголт нь бүх өрөөний халаах хэрэгсэл яг адилхан хэмтэй халж байх ёстой гэж гэдэг. Гэтэл ирэх шугам, буцах шугам нь өөр өрөөгөөр дамждаг учир айлуудын өрөөний температурт зөрөө гардаг байна.  Юутай ч удахгүй иргэдийнхээ тав тухтай амьдрах орчин нөхцөлийг сайжруулах, дулааны хэмийг нэмэгдүүлэх талаар мэргэжлийн байгууллагууд уртасгасан цагаар болон бүх нийтийн амралтын өдрүүдээр ажиллаж байна. “Эрдэнэт-Ус” ОНӨХК-ийн хамт олны ажлыг хүндрүүлж буй бас нэг зүйл нь иргэд хуурамч дуудлага өгөх, дуудлагаар очиход гэртээ байхгүй байх, хаягаа буруу хэлэх зэрэг тохиолдлууд гарч байна. [sgmb id="1"]