Өнөөдөр арванхоёрдугаар сарын 14. Одоогоос  40  жилийн тэртээ энэ өдөр жилдээ дөрвөн сая тонн хүдэр боловсруулах хүчин чадал бүхий Монгол-Зөвлөлтийн хамтарсан Уулыня баяжуулах “Эрдэнэт” үйлдвэрийн эхний ээлжийг ашиглалтад хүлээн авах ёслолын арга хэмжээ болж байжээ. Энэхүү нээлийн арга хэмжээнд МАХН-ын Төв хорооны нэгдүгээр нарийн бичгийн дарга, БНМАУ-ын Ардын Их Хурлын Тэргүүлэгчдийн дарга Ю.Цэдэнбал, ЗСБНХУ-ын Сайд нарын Зөвлөлийн орлогч дарга И.В.Архипов нар оролцсон байна. Энэхүү түүхэн өдрийг тохиолдуулан “Эрдэнэт үйлдвэр” ХХК-ийн хамт олон Гендерекцийн өмнөх талбайд Монгол улсын төр, нийгмийн нэрт зүтгэлтэн, Монгол улсын баатар, хөдөлмөрийн баатар, маршал Ю.Цэдэнбалын гэрэлт хөшөөг байршуулж нээлтийг нь хийлээ. Хөшөөний нээлтэд аймгийн Засаг дарга Д.Батлут, “Эрдэнэт үйлдвэр” ХХК-ийн Ерөнхий захирал Х.Бадамсүрэн, “Цэдэнбалын академи”-ийн гишүүд, Юмжаагийн Цэдэнбалын төрсөн дүү Аюушжав болон үйлдвэрийн уурхайчид, эрдэнэтчүүдийн төлөөлөл оролцож, хүндэтгэл илэрхийллээ. 1978 оны арванхоёрдугаар сарын 14-ний өдөр болсон “Эрдэнэт” үйлдвэрийн эхний ээлжийг хүлээн авах цуглаан болж  Орос, Монголын талууд үйлдвэрийн Ашиглалтын үндсэн гэрээнд гарын үсэг зурж байжээ. Улмаар Эрдэнэт үйлдвэрийн нээлтийн үеэр Ю.Цэдэнбал, И.В.Архипов нар Баяжуулах фабрикийн нэгдүгээр тээрмийг залгасан удирдлагын самбарын товчлуурыг дарснаар үйлдвэрийн эхний ээлж ашиглалтад орсон байна.  2016 оны есдүгээр сарын 24-ний өдрийн Монгол улсын Засгийн газрын тогтоолоор “Эрдэнэт үйлдвэр” ХХК-ийг Юмжаагийн Цэдэнбалын нэрэмжит болгосон ажээ.