Аймгийн Цагдаагийн газарт оны эхний долоон сарын байдлаар бүртгэгдсэн гэмт хэргийн талаарх мэдээллээс харахад, авто зам дээр үйлдэгдсэн хэргийн тоо өссөн үзүүлэлттэй байна. Энэ оны байдлаар Хөдөлгөөний аюулгүй байдлын эсрэг 39 хэрэг бүртгэгдсэн нь өнгөрсөн оны мөн үеэс 77,3 хувиар нэмэгдсэн. Мөн согтуугаар тээврийн хэрэгсэл жолоодсон хэрэг зөрчил 1130 тохиолдол гарсан нь өнгөрсөн оноос 5,5 хувиар өссөн байна. Согтууруулах ундаа хэрэглэсэн үедээ автомашин жолоодож, замын хөдөлгөөнд оролцсон 815 жолоочийн эрхийг хассан нь өмнөх жилээс 10,4 хувиар нэмэгдсэнийг аймгийн Цагдаагийн газрын дүн бүртгэлийн мэдээлэлд дурьджээ. Дээрхээс дүгнэхэд, хөдөлгөөний аюулгүй байдлыг сайжруулах талаар аймгийн Цагдаагийн газраас дорвитой ажил зохион байгуулахыг дээрх тоо өгүүлж байна. Үүнээс гадна зам дагуу байрлуулсан хяналтын камеруудын бүрэн ажиллагааг хангахгүй байгаагаас дээрх осол гэмтэл нэмэгдэх нөхцлийг бүрдүүлж, эрдэнэт хүний амь нас сүйдэж, иргэд эд хөрөнгөөрөө хохирч байгааг аймгийн Хууль зүйн хэлтэс, Цагдаагийн газрын Замын цагдаагийн тасаг анхааралдаа авахыг олон нийт хүсэн хүлээж байна. М.Мөнх