Аймгийн ИТХ-ын Тэргүүлэгчдийн XI хуралдаан даваа гарагт Нутгийн удирдлагын ордонд боллоо. Энэхүү ээлжит хуралдаанаар

• 2019-2020 оны Эрдэнэт хотын болон хөдөө аж ахуйн өвөлжилтийн бэлтгэл  хангах арга хэмжээний төлөвлөгөөний хэрэгжилтийн явц байдлын тухай,
• Аймгийн 2019-2020 оны хичээлийн шинэ жилийн бэлтгэл ажлын явцын тухай,
• Хугацаа сунгах тухай,
• Бусад гэсэн асуудлыг хэлэлцсэн юм.

Хуралдаанд аймгийн ИТХ-ын Тэргүүлэгчдийн дарга П.Пүрэвлхагва, Тэргүүлэгч аймгийн Засаг даргын орлогч А.Түвшинжаргал, Тэргүүлэгч аймгийн Засаг даргын орлогч С.Батжаргал, Тэргүүлэгч  “Эрдэнэт Ус ДТС”ОНӨҮГ-ын захирал Д.Бүүвэйбаатар, Тэргүүлэгч “Эрдэнэт Булганы цахилгаан түгээх сүлжээ” ТӨХК-ийн Санхүү, эдийн засгийн асуудал эрхэлсэн орлогч захирал Д.Мөнхбат, Тэргүүлэгч Хот байгуулалт, барилга захиалагчийн алба ОНӨҮГ-ын захирал Б.Мөнхдалай нар оролцсон юм.

2019-2020 оны  аймгийн өвөлжилтийн бэлтгэл ажлын төлөвлөгөөний хэрэгжилтийн талаар хэлэлцсэн учраас аймгийн ЗДТГ-ын хэлтэс, алба, агентлагийн удирдлага, мэргэжилтнүүд өргөн бүрэлдэхүүнтэй оролцож хийж гүйцэтгэсэн ажлын явцын талаар болон Тэргүүлэгчдийн асуултад хариулт өглөө.

Хуралдаанаас 2019-2020 оны аймгийн болон хөдөө аж ахуйн өвөлжилтийн бэлтгэл хангах арга хэмжээний төлөвлөгөөний хэрэгжилттэй танилцаад зарим асуудалд Тэргүүлэгчдийн хуралдааны тэмдэглэлээр хугацаатай үүрэг даалгавар өгч аравдугаар сарын 15-ны дотор дахин энэ асуудлыг авч хэлэлцэхээр болсон юм. Аймгийн ИТХ-ын Тэргүүлэгчдийн энэ оны тавдугаар сарын 8-ны өдрийн ээлжит хуралдааны 39 дүгээр тогтоолоор “2019-2020 оны хотын өвөлжилтийн бэлтгэл хангах ажлыг төлөвлөгөө”-г баталсан. Төлөвлөгөөнд нийтдээ аймгийн хэмжээнд 36 нэр төрлийн ажил авч хэрэгжүүлэхээр тусгасан байв. Аймгийн ЗДТГ-ын зүгээс өвөлжилтийн бэлтгэл ажлаас 5 нь бүрэн хэрэгжсэн, 23 нь хэрэгжиж байгаа, хугацаа болооогүй болон удаашралтай байгаа 8 ажил, нийтдээ төлөвлөгөөний хэрэгжилт 69 хувьтай байна хэмээн танилцуулсантай аймгийн ИТХ-ын Тэргүүлэгчид тэр бүр санал нийлэхгүй байлаа. Бүр зарим ажил зөвхөн цаасан дээр нэр төдий байхад өвөлжилтийн бэлтгэл ажлын төлөвлөгөө яаж ч хичээгээд 69 хувьд хүрсэнийг хэн хүнгүй ойлгоход хүндрэлтэй байсан юм.