Монгол улсын Засгийн газрын тэргүүн, Ерөнхий сайд У.Хүрэлсүх ням гарагийн өглөө 08.00 цагт Эрдэнэт хотод хүрэлцэн ирлээ. Түүнийг Амарын талбайд Орхон аймгийн Засаг дарга бөгөөд Эрдэнэт хотын захирагч Д.Батлут, Эрдэнэтийн цэргийн хүрээний Хүндэт харуул угтан авлаа.

Ерөнхий сайд У.Хүрэлсүх Хүндэт харуулын даргын рапортыг хүлээн авсаны дараа аймгийн ЗДТГ-ын удирдлага, агентлаг, хэлтсийн дарга нартай гар барж уулзав. Үүний дараа Орон сууцны 1А хорооллын ажилтай танилцахаар хөдөлсөн юм. Засгийн тэргүүн энэ удаад Эрдэнэт хотод нэг хоног ажиллах ажээ. Тэрбээр Шинжлэх ухаан, технологийн парк, “Бэрэн метал” гангийн үйлдвэр, Эрдэнэт үйлдвэр, “Эрдэнэтийн ДЦС”-ын өргөтгөлийн ажилтай танилцах аж.

Мөн үдээс хойш  “Эх орон дуудаж байна” цугларалтад оролцсоныхоо дараа 17.00 цагаас “Уурхайчин” соёлын ордонд Эрдэнэт хотын иргэдтэй уулзалт хийхээр төлөвлөжээ.