Өнөөдөр аймгийн Засаг даргын шуурхай зөвлөгөөн болов. Энэ удаагийн шуурхай зөвлөгөөнөөс харвал Баян-Өндөр сум “эзэнгүй” дарга нар нь ээлжийн амралтаа эдлээд 14 хоногт нэг удаа болдог шуурхай зөвлөгөөнд нэгэн түшмэлээс өөр хүн ирсэнгүй. Сумын Засаг дарга И.Баасанжав албан ёсны ээлжийн амралттай байгаа аж. Харин даргыг эзгүй хойгуур орлодог орлогч нь өвчтэй, Тамгын дарга нь ч бас л өвчтэй гэдэг шалтгаанаар ажилдаа ирээгүй байгаа ажээ. Төрийн гурван өндөрлөг гэдэг шиг сумын гурван дарга байхгүй хойгуур аймгийн Засаг даргын шуурхай зөвлөгөөн дээр Баян-Өндөр сумын ажил амьдрал, өвөлжилтийн бэлтгэлийн талаар таг чиг өнгөрлөө. Аймгийн Засаг даргын шуурхай зөвлөгөөн 14 хоногт нэг удаа болдог. Тэгвэл ирэх 14 хоногт Баян-Өндөр суманд юу болох, ямар ажил зохиогдох, өвөлжилтийн бэлтгэл хэрхэн хангаж байгаа талаар орхончуудад ямар ч мэдээлэл алга. “Саалиа хаяад үхдэг эхнэр байдаг уу” гэдэгчлэн хадлан тариа, өвөлжилтийн бэлтгэл ажил эхэлсэн энэ цагт “өвчтэй” гээд утсаа салгаад алга болчихдог дарга нарыг төрийн хүн гэх үү. Ямбыг нь эдэлж байгаа бол ялыг нь ч давхар үүрэх ёстой гэсэн нэг эвгүй ч гэмээр үг бий. Засаг даргын орлогч Г.Алтангэрэл, Тамгын дарга М.Эрдэнэчимэг нар өнөөдөр албаны машин унасан нэг их том дарга нар эрдэнэтчүүдэд харагддаг. Баян-Өндөр сумын өвөлжилтийн бэлтгэл муу хангагдсан бол энэ хоёр даргатай хариуцлага тооцвол таарах ч юм шиг.