Аймгийн Онцгой комиссоос өдөр бүрийн 11.30 цагт орон нутгийн иргэдэд зориулж мэдээлэл хийхээр болсон. Гэвч өнөөдөр мэдээлэл хийхгүй ажил ихтэй байгаа гэдэг шалтгаанаар хойшлуулсан тухай албаны хүн мэдээллээ. 

11.00 цагийн Эрүүл мэндийн яамны мэдээллээр бол өнгөрсөн 24 цагийн хугацаанд манай аймагт халдварын 15 тохиолдол нэмж бүртгэгдсэн байна. Ингэснээр Орхон аймаг халдварын 61 тохиолдол бүртгэгдсэн гэдэг статистик мэдээлэлд багтжээ. Гэхдээ энэхүү 61-ийн 25 нь оны өмнөх халварын тохиолдол гэж үзвэл гуравдугаар сарын 25-наас хойш аймгийн хэмжээнд 36 тохиолдол сүүлийн 3 хоногт бүртгэгджээ.  УОК-иос энэ сарын 28-ны өглөөний 06.00 цагаас эхлэн  дөрөвдүгээр сарын 11-ний 06.00 цаг хүртэлх хугацаанд халдвар илэрсэн Архангай, Баянхонгор, Дархан-Уул, Дорноговь, Завхан, Орхон, Төв, Хөвсгөл, Хэнтий, Өвөрхангай, Увс аймгийг халдварын тархалтын Улаан түвшинд хугацаанд шилжүүлжээ.

Улаан түвшинд шилжүүлсэн албан ёсны бичиг тоот нь манай аймагт ирээгүй байна. УОК-ын 45 тоот тогтоолоор аймгийн Онцгой комисс орон нутагтаа тохирсон, тодорхой арга хэмжээ авах тухай тогтоол шийдвэр гараад байсан. Маргааш өглөөнөөс эхлэн улаан төвшинд шилжвэл аймаг, орон нутаг ямар арга хэмжээ авах, эрдэнэтчүүдийн амьдрал хэрхэн өрнөх энэ тэр нь одоогоор тодорхойгүй байна.