Ерөнхийлөгчийн ээлжит сонгуультай зэрэгцээд улс төрд МАН, МАХН-ын нэгдэл олны анхаарлын төвд байна. 

МАХН-ын дарга Н.Энхбаяр “Мэдээж том зорилтуудыг хэрэгжүүлэхэд МАХН-ын гишүүд оролцоно. Тэгэхийн тулд тодорхой албан тушаалд очно. Намын албан тушаалд 30 орчим хувийн квот өгсөн. Жишээлбэл, МАХН-ын гишүүдээс Удирдах зөвлөлд найм, Бага хуралд 110 хүн, нийслэл, аймаг, намын хорооны тэргүүлэгч гишүүнээр зургаан хүн гэх мэтээр ярилцсан зүйл бий. Улсын хэмжээгээр МАХН-ын төлөөлөл 2200 орчим хүн намын албан тушаалд очно” хэмээн албан ёсоор мэдэгдээд байгаа.

Тэгвэл Орхон аймгийн МАХН-ын хамгийн том төлөөлөл болох нарийн бичгийн дарга Г.Шархүү аймгийн Засаг дарга С.Батжаргалын орлогч болох нь. МАХН-ын Орхон аймгийн Түмтийн дарга С.Ганбаатар албан ёсоор АН-д гишүүнээр элссэн. “Монгол талаасаа нэгдүгээр хүн нь” гэгчээр МАХН-ыг төлөөлөх эрх өнөөдөр Г.Шархүү даргад бий. Аймгийн МАХН-д оюунлаг, боловсролтой, Эрдэнэт хотоо гэсэн сэтгэлтэй олон залуу бий. Тэд ч хоёр нам болон намын дарга нар болох У.Хүрэлсүх, Н.Энхбаяр нарын хооронд байгуулсан гэрээгээр ажил, албан тушаалд очих боломж бүрдэж байгаа.

Мөн үүнээс гадна аймгийн МАН-ын хорооны тэргүүлэгчийн 6 нь МАХН-аас томилогдоно. МАН хоёр нам нэгдэх ажлын хүрээнд дүрмэндээ тодорхой өөрчлөлт оруулаад байгаа бололтой. Дээр нь нэмээд хэлэхэд МАХН-ын дарга Н.Энхбаяр энэ удаад МАН-ын дарга У.Хүрэлсүхтэй тохиролцохдоо тодорхой албан тушаалуудыг амлаад байгаа. Ингэсэн тохиолдолд Шадар сайд болон Засгийн газрын  хоёр ч сайд МАХН-аас тодорно. Мөн 4-5 агентлаг, 3 дэд сайдын албан тушаалд МАХН-ын гэх тодотголтой эрхмүүд очих тухай яриа хөөрөө газар авч эхэлсэн. Ийм тохиолдолд Засгийн газрын асуудал яригдаж мэдэх хэдий ч энэ нь дараагийн асуудал. Орон нутгийн хувьд аймгийн Засаг даргын орлогч, бас бус агентлагийн дарга нар, Орон нутгийн өмчит үйлдвэрийн газрын захирлуудын суудал ногоон гэрлээр МАХН-ын статустай болж мэдэх тухай дуулдана. Ямар ч байсан эхний ээлжинд хоёр намын зөвшилцөл, МАХН-ын дарга Н.Энхбаярын мэдэгдэл зэргээс харвал аймгийн Засаг даргын орлогчоор ямар ч байсан МАХН-ын нарийн бичгийн дарга Г.Шархүү томилогдох бололтой. Г.Шархүү даргад ч тийм гавьяа бий. МАХН-ыг УИХ-д суудалтай нам, улмаар Ерөнхийлөгчийн сонгуульд нэр дэвших эрхтэй улс төрийн гуравдагч том хүчин болоход түүний оруулсан хувь нэмэр тодорхой хэмжээнд байгаа. МАХН-ын гишүүн, дэмжигчдийн хувьд Г.Шархүү гэдэг хүнийг аймгийн Засаг даргын орлогч болгосон цагт МАХН, МАН-ын хувьд нэгдэх, нэг нам болох, нэг үзэл баримтлалын төлөө явж байгаа нь үнэн юм байна гэж сая итгэл, үнэмшил төрнө. Тэгэж гэмээнэ айсуй сонгуульд МАН-ын нэр дэвшигч Орхон аймгийн МАХН-ын мянга мянган гишүүн, дэмжигчдийн саналыг авна.