Манай аймгийн Баян-Өндөр сумын Оюут багийн нутагт “Сайхан” төвийн ард баригдаж буй барилгын траншейны нүхэнд 16 настай хүү шороонд дарагдаж нас баржээ. Уг үйлдвэрлэлийн осол энэ сарын 21-ний 18.02 цагийн үед болжээ. Аймгийн Онцгой байдлын аврагчид дуудлагын дагуу очиход гурван хүн шороонд даруулсаны нэг нь цээжин бие нь ил нөгөө хоёр иргэн хаана шороонд даруулсан газар тодорхойгүй байсан аж. Аврагчид ажил хийж байсан хүмүүсийн мэдээллийн дагуу хоёр дахь иргэнийг 30 шахам минутын хугацаанд эрж хайж гаргасан байна. Харин гурав дахь хүн нас барсан байдалтай олджээ. Нас барсан иргэн 16 настай, хүрзээ атгасан чигтээ амьсгал хураасан байсныг илрүүлж цагдаагийн газарт хүлээлгэн өгсөн байна.

Одоогийн байдлаар ослын талаарх Мэргэжлийн хяналтын байцаагчийн дүгнэлт гараагүй, мэдээлэл өгөхгүй гэж байна. Амьд гарсан 2 иргэний нэг нь БОЭТ-ийн Сэхээн амьдруулах тасгийн эрчимт эмчилгээнд эмчлүүлж байгаа бол нөгөө нь шокийн байдалтай эмчийн хяналтад байгаа ажээ. Онцгой байдлын болон ойр орчмын иргэдийн мэдээллээс харвал барилгын ажилчид хөдөлмөр хамгааллын наад захын аюулгүй ажиллагааг хангаагүй. Дулааны шугам хийхээр ухсан нүхнийхээ шороог дөнгөж ирмэг дээр нь гаргасан байдалтай, мөн насанд хүрээгүй буюу 16 настай хүүхэд ажиллуулсан зэрэг зөрчилтэй байсан бололтой. Мэргэжлийн болон хууль хүчний байгууллагынхан хяналт шалгалт хийж байна.