“Ачит Ихт” компани Монголд анх удаа дөрвөн улирлын мөсөн өргөө байгуулж, нээлтийг нь хийлээ. Монголын хувийн хэвшлийнхэн нийлж дэлхийн спортын стандартын дагуу том бүтээн байгуулалтыг гардан босгосон нь бахархалтай. Эрдэнэтээр овоглодог унаган хүүхдийн хувьд зэсэн уулын буяныг монголчууд эдлээд барахгүй юм даа гэсэн бахархал төрж байна. “Ачит Ихт” компани Эрдэнэт уулын овоолгыг ашиглаж үйлдвэрлэл явуулдаг үндэсний компани.  Хөрсөндөө зэс, оюу, алттай Эрдэнэт уулын үр шимийг түмэн олны хүүхэд залуусын хөгжил, ирээдүйд зориулж ийм сайхан өргөө байгуулж, гол хөрөнгө оруулалтыг гаргасан тус компанийнхан 100 жилд ч мартагдахааргүй гавьяа байгуулжээ.

Эрдэнэтийн унаган хүүхэд гэснээс, аав минь Эрдэнэт үйлдвэрийг барьж байгуулсан ажилчин явлаа. Манай авдрын ёроолд ногоон өнгөтэй чулуу зөндөө байдаг сан. Тэр чулуунууд оюу эрдэнийн судалтай ховор эд гэдгийг мэдэхгүй бидний үеийнхэн  ногоон чулуугаар тоглож өссөн. Ийм л сайхан, тийм л буянтай уул минь өгөөжөө мянган үед ч хайрласаар байна.

Эрдэнэтийн 1 дүгээр микрт одоо ч байгаа мөсөн каток дээр орос, монгол хүүхдүүд өвлийн цагт битүү шуугиж байдаг сан. Орос ах нарын соёлоос улбаалсан тэр жижигхэн каток улсын нийслэлд өргөө болон тэлжээ.

“Ачит Ихт” компани энэхүү том өргөөнийхөө нээлтэнд Орхон аймгийн удирдлагууд, хэвлэл мэдээллийн төлөөллийг урьсан. “Мянга сонсохоор нэг удаа үз” гэдэг, бид ч удахгүй Эрдэнэт хотдоо мөсөн ордон байгуулах сайхан цаг ирэх болтугай.

 М.МӨНХЦЭЦЭГ