“Батаа бол соёлтой залуу, эмэгтэй хүнд суудал тавьж өгдөг. Харин Болд бол боловсролтой, олон хэлээр ярьдаг” хэмээн бид хэн нэгнийг үнэлж цэгнэдэг. Эндээс харвал “Соёл” гэж чухам юуг хэлээд байгаа юм бол. Эмэгтэй хүнийг хүндэлдэг болохоороо Бат соёлтой болж байна уу, эсвэл гадаадад өндөр боловсрол эзэмшсэн, англи германаар хэлээр чөлөөтэй ярьдаг Болд манай нийгэмд хамгийн соёлтой залуу юу. Д.Буян багшийн “Нийгмийн тухай мэдлэг” сурах бичигт “Соёл гэж хүний байнгын, идэвхтэй, чөлөөт үйл ажиллагааны үр дүнд бий болж уламжлагдаж байдаг хэм хэмжээ, итгэл үнэмшил, бэлгэ тэмдэг, үнэт зүйлсийн цогц, хүний хөгжсөн түвшин юм. Өөрөөр хэлбэл, соёл нь хүний ололт амжилтын цогцол юм” хэмээн тодорхойлжээ. Эндээс дүгнэвэл соёл бол хүнээс хүнд уламжлдагдан ирдэг зүйл байх нь. Хоёрдугаарт, соёлоор хүний хөгжлийн түвшинг тодорхойлж болох нь. Хамгийн гол нь соёл бол хүний амжилтын үр дүнд бий болсон үнэт зүйл ажээ.  

Соёл /культура/ гэдэг ойлголт анх газар боловсруулж тариа тарихтай холбогдож латин хэлний cultura- хагалах, боловсруулах, арчлах, сайжруулах гэсэн утгатай үгнээс гарчээ. Улмаар хүний гэгээрэл, боловсролын талыг харуулсан ойлголт болж амьдралд  хэрэглэгдэх болов. Орчин үед соёл нь байгалийн гэдэг ухагдахуунаас ялгагдах утгатай болж хүний оюун ухаан, хөдөлмөрөөр бий болсон зүйлийг нэрлэх болжээ. Нэг үгээр хэлбэл, хөдөлмөрийн явцад бий болсон эдийн болон оюуны бүх баялгийг соёл гэж нэрлэдэг байна. Нийгэм хөгжих бүрд хүн төрөлхтний бий болгосон соёл түүнийг дагаад хөгжиж байдаг аж. 1970-80-аад оны хүүхдүүд тухайн үедээ гар утас гэдэг зүйлийг талаар төсөөлөл ч үгүй байсан. Тэдний үед урлаг, утга зохиол, уран сайхны киноноос соёлын тухай ойлголтыг их бага хэмжээгээр авч байсан. Өнөөдөр ухаалаг утаснаас ч соёл харагдах учиртай. Цахим орчинд зөв мэдээлэл түгээх, зөв боловсон харьцахаас таны, миний, бидний хүүхэд багачуулын соёл харагдана. Иймээс соёл та бидний нийгмийн амьдралд тун чухал үүрэг гүйцэтгэдэг байна.

1980-аад онд Эрдэнэт хотыг дайран өнгөрсөн гадаадын хүн бүү хэл хөдөө, орон нутгийн иргэд “Эрдэнэт хот бол хоггүй, цэвэр цэмгэр их сайхан хот байна билээ. Хүмүүс нь их соёлтой. Арга ч үгүй дээ, социалист орнуудын залуустай мөр зэрэгцэн ажиллаж байгаа учраас Эрдэнэтийнхэн Монголд хотын соёлыг хамгийн түрүүнд нэвтрүүлсэн ч байж мэднэ” хэмээн ярьж хэлдэг, бичдэг, утга уран зохиолд ч энэ талаар туссан байдаг. Тэгвэл аймаг, орон нутгийн удирдлагаас “Соёлыг түгээе” аяныг нэг сарын хугацаатай зарлаж эрдэнэтчүүдийн бий болгосон уламжлалт соёлд цучил нэмж, өнгө оруулж байна. Та бидний хувьд мэндлэхээс эхлээд л соёл харагдаж бүр цаашилбал үнэртэнэ. Иймд эрдэнэтчүүд бид “Соёлыг түгээе” аяныг дэмжиж үр хүүхэддээ үлгэр дууриалал болж, тэднийхээ ирээдүйг гэрэл гэгээтэй байлгахыг тулд хотынхоо соёлд хувь нэмрээ оруулъя, Соёлыг түгээе.