Аймгийн ИТХ-ын Ээлжит бус IV  хуралдаанаар 2022 онд Үл хөдлөх эд хөрөнгө эзэмшигчдээс авах татварын  хэмжээг өөрчлөн тогтоосон билээ. Ингэхдээ аймгийн хэмжээнд Үл хөдлөх эд хөрөнгө өмчлөгчдийг гурван зэрэглэлд хамруулж татварын хувь хэмжээг ялгавартай тогтоосон байна. Үүнд,

Нэгдүгээр зэрэглэлд, Түгээмэл тархацтай ашигт малтмал ашиглаж байгаагаас бусад уул уурхайн салбарын олборлолт, баяжуулалтын үйлдвэрлэл эрхэлдэг аж ахуйн нэгжүүдийн албан татварын хэмжээг 2 хувиар тогтоосон юм. Үүнд манай аймгийн “Эрдэнэт үйлдвэр” ТӨҮГ, “Ачит Ихт” ХХК, “Эрдмин” ХХК-иуд татварын дараах ашгаас 2 хувиар үл хөдлөх эд хөрөнгийн татвар төлнө. Дээрх аж ахуйн нэгжүүд нь 2013-2021 оны хооронд 1 хувиар үл хөдлөхийн татвар төлдөг байжээ. Тэд аймгийн төсөвт 2021 онд 9 тэрбум 79 сая төгрөгийн татвар төлсөн байна. Ирэх 2022 онд дээрх 3 аж ахуйн нэгж 18 тэрбум 158.8 сая төгрөгийн үл хөдлөх эд хөрөнгийн татварыг орон нутагт төвлөрүүлэхээр боллоо.

Хоёрдугаар зэрэглэлд,  Шатахуун түгээх станц, банк, уур, ус, эрчим хүчний компаниудын бүх үл хөдлөх хөрөнгийн жилийн албан татварын хувь хэмжээг 1 хувиар тогтоожээ.  Ингэснээр 2022 оноос ийм төрлийн үйл ажиллагаа эрхэлдэг аж ахуйн нэгжүүд үл хөдлөх эд хөрөнгийн албан татварыг 1 хувиар төлөхөөр боллоо.  Аймгийн хэмжээнд 20 гаруй ШТС ажилладаг ч 7 колонк л үл хөдлөх эд хөрөнгийн татвар төлдөг.Бусад нь Булган аймгийн нутаг дэвсгэрт үйл ажиллагаа явуулдаг буюу А1001 зам дагуух колонкиуд юм. Банкууд цар тахалтай үед Монголын хэмжээнд хамгийн өндөр ашигтай ажилласан байгуулагаар шалгараад байгаа. Тиймээс тэдний үл хөдлөх эд хөрөнгийн татварын хэмжээг нэмэх нь зөв хэмээн аймгийн ИТХ-ын төлөөлөгчид үзсэн юм.  

Гуравдугаар зэрэглэлд, Бусад иргэн, аж ахуйн нэгж, байгууллагын үл хөдлөх эд хөрөнгийн жилийн албан татварын хувь хэмжээг 0.6 хувиар хэвээр үлдээж, ирэх онд ч мөн 0.6 хувийн татвар төлөх юм. 

Өмнө нь 2013 оноос өнөөг хүртэл мөрдөж ирсэн аймгийн ИТХ-ын 2013 оны нэгдүгээр сарын 24-ний 6 тоот тогтоолоор хоёр, гуравдугаар зэрэглэлийн үйл ажиллагаа эрхлэгчид 0.6 хувиар тооцон үл хөдлөх эд хөрөнгийн татвар төлж ирсэн. Зөвхөн 2021 онд л гэхэд хоёр, гуравдугаар зэрэглэлийн үйл ажиллага эрхэлдэг аж ахуйн нэгж, иргэд аймгийн төсөвт 1 тэрбум 85 сая төгрөгийн татвар төлсөн байна.

Хуульд өөрчлөлт орсноор ийнхүү татварын хувь хэмжээ өөрчлөгдөж байгаа юм.

Манай аймгийн хэмжээнд үл хөдлөх эд хөрөнгийн татвар төлдөг 1450 аж ахуйн нэгж бүртгэлтэй байдаг. Үүний 1041 нь иргэн байна. Харин 409 аж ахуйн нэгж үл хөдлөх эд хөрөнгийн татвар төлөгчөөр бүртгэгджээ.

Энэ удаагийн аймгийн ИТХ-ын ээлжит бус IV хуралдаанаар үл хөдлөх эд хөрөнгийн татварын хувь хэмжээнд өөрчлөлт оруулсанаар орон нутагт төвлөрөх орлого 20 шахам тэрбум төгрөгт хүрэх ажээ.

Аймгийн ИТХ-ын тогтоолыг Хууль зүй, дотоод хэргийн яаманд хүргүүлж, хянуулан улмаар улсын нэгдсэн бүртгэлд бүртгүүлсэний дараа аймгийн хэмжээнд дагаж мөрдөх юм.  Үл хөдлөх эд хөрөнгийн албан татварыг төсөвт төвлөрүүлэлт жил бүр нэмэгддэг байна. Тухайлбал, 2016 онд 6.5 тэрбум төгрөг байсан бол 2017 онд 6.9 тэрбум төгрөг болж нэмэгджээ. Харин 2018 онд 7.8 тэрбум, 2019 онд 8.4 тэрбум төгрөг болж өссөн байна.