Эрдэнэт хотын амьдралыг өөрчлөнө, шинэчлэнэ гэж олны итгэл хүлээн ажиллаж буй Орхон аймгийн Засаг дарга Г.Зоригтоор удирдуулсан баг энэ орон нутагт олон шинэчлэлийн эхлэлийг тавьж байна. Түүний нэг нь хотын цэцэгжүүлэлт. Эрдэнэт хот үүсэж, хөгжсөн 40-өөд жилийн түүхэнд энэ жил анх удаа хотын төв талбай, төв гудамж болон Нутгийн удирдлагын ордны орчмын цэцэгжүүлэлтийг урлагийн түвшинд хийлээ. Орхон аймгийн төр, захиргааны байгууллагын дэргэд Цэцэгжүүлэлт, ногоон байгууламжийн алба байгуулагдсаны үр дүн ийнхүү Эрдэнэтийн ард иргэдэд ил тод харагдав. Сайхан цэцэг хараад баясахгүй хэн байхав. Тэр тусмаа амьд цэцгээр уран хээ хуар гаргаад хотын төв болон гудамж талбайн орчинг чимэх нь хараад ханамгүй, хичнээн тайтай сайхан байдгийг Эрдэнэтийнхэн энэ зун жинхэнэ мэдэрлээ дээ. Хүн сайхан орчин, тансаг байгаль харж сэтгэлийн таашаал авах дуртай юм болохоор хотын энэ сайхан шинэ орчинд иргэд огт гар, хөл хүргэлгүй зуныг үдлээ. Цэцэгжүүлэлт, ногоон байгууламжийн албаны ажилтнууд ч энэ шинэ ажилд амжилттай суралцаж, суулгасан цэцэгсээ өдөр бүр арчилж тордон, усалж арчилсаар байгааг харахад бахархмаар байлаа. Амьд цэцэг, ногоон байгууламжийн урлагийг бид гадаадын оронд явахдаа л хардаг, гайхан шагшдаг байсан бол тэр сайхныг Орхон аймгийн төр, захиргааны байгууллага удирдаад, хийлгээд амжилтанд хүрлээ. Эрдэнэтийн ард иргэд жил бүрийн зун шинэ шинэ өнгө хэлбэртэй амьд цэцгэн урлагийг харна гэдэгт одоо эргэлзэх зүйлгүй боллоо. Сайхан байна. Ж.ОЮУН