“Эрдэнэт үйлдвэр” ТӨҮГ-аас цаг үеийн асуудлаар хэвлэлийн бага хурал хийлээ. Тус хуралд “Эрдэнэт үйлдвэр” ТӨҮГ-ын Ерөнхий захирлын Санхүү, эдийн засаг хариуцсан орлогч захирал Д.Үүрийнтуяа оролцож мэдээлэл өгөв.

“Эрдэнэт үйлдвэрийн төсөв төлөвлөгөө, санхүүжилт зэрэг бүх асуудлыг 2019 оноос хойш Төрийн өмчийн бодлого зохицуулалтын газар  жил бүр баталж өгдөг. Батлагдсан төсөв, төлөвлөгөөний хүрээнд Эрдэнэт үйлдвэр үйл ажиллагаагаа явуулж байгаа. Эрдэнэт үйлдвэрийн өнөөгийн суурь нөхцлийг танилцуулах нь зүйтэй байх. 2019 онд Эрдэнэт үйлдвэр нь ТӨҮГ болсон цагаас хойш ямар нэгэн олон улсын банк, санхүүгийн байгууллагад нэг ч төгрөгийн зээл өргүй, зээлийн дарамтгүйгээр өдөр тутмын ажлаа явуулж байгаа. Өмнө нь үүсэн зарим хүндрэлтэй асуудлыг 2019 онд бүрэн шийдвэрлэсэн.

Эрдэнэт үйлдвэр 2019, 2020, 2021 онд нэг ч зээл аваагүй, зээлийн төлбөр нэрээр нэг ч төгрөгийн төлбөр төлөөгүй. Өөрийн үйл ажиллагааны үр дүнгээр үйлдвэр маань үйл ажиллагаагаа санхүүжүүлээд явж байгаа. 2021 оны байгууллагын Бизнес төлөвлөгөө, Хөрөнгө оруулалтын төлөвлөгөөг Төрийн өмчийн бодлого, зохицуулалтын газар 2020 оны арванхоёрдугаар сард баталж өгсөн. Батласан төлөвлөгөөний хүрээнд бид 230 сая ам.долларын зээл авч энэ онд хэрэгжүүлэх төсөв төлөвлөгөөг санхүүжүүлэхээр төлөвлөөд байсан. Гэхдээ өнөөдрийн байдлаар, энэ оны хувьд нэг ч төгрөгийн зээл аваагүй байгаа. Үйлдвэрийн дансанд 230 сая ам доллар орж ирсэн гэдэг мэдээлэл бол андуу, машаа мэдээлэл. Манай үйлдвэрт зээлийн санхүүжилтийн эх үүсвэр гэж гаднаас нэг ч ам.доллар орж ирээгүй. Зээлтэй холбоотой нэг ч төгрөгийн зардал гаргаагүй байна. Зээлтэй холбоотой ямар нэгэн гэрээ хэлцэл хийсэн зүйл байхгүй.

Харин бид ирэх онд төсөл, хөтөлбөрүүдээ хэрэгжүүлэхийн  тулд зээлийн эх үүсвэрээ судалж байна. Хөрөнгө оруулагчдыг судалж байна. Хамтран ажиллах тухай гэрээ, хэлцлүүдийг судалгааны түвшинд хийж байна” хэмээлээ.