Монгол улсын Засгийн газраас 21 аймгийн 330 сумыг нийгэм, эдийн засгийн хөгжил, хөгжлийн чиг хандлага, ажлын байр нэмэгдүүлсэн байдал гээд 20 шахам үзүүлэлтээр шалгаруулахад Булган аймгийн Хутаг-Өндөр сум 2021 оны ажлаараа шалгарч Монгол улсын тэргүүний сум болсон билээ. Тавдугаар сарын 27-нд Булган аймгийн Хутаг-Өндөр сумын ажилч, малч, хөдөлмөрч түмэн Улсын Тэргүүний сум Өргөмжлөл, Хүндэтгэлийн туг, шагналаа гардан авлаа. Сумын сургуулийн Биеийн тамирын талбайд болсон Шагнал хүлээн авах ёслолын ажиллагаа өргөн дэлгэр, сайхан боллоо.

Хутаг-Өндөрчүүдэд энэхүү шагналыг Монгол улсын Засгийн газрын Хэрэг эрхлэх газрын Хууль, эрх зүйн газрын дарга Н.Мягмар, Референт Б.Гүнчинхүү нар гардууллаа. Н.Мягмар дарга Засгийн газрын тогтоолыг уншиж танилцуулан Монгол улсын Тэргүүний сумын Хүндэтгэлийн тугийг Хутаг-Өндөр сумын Засаг дарга П.Лхагва-Очирт гардуулсан юм. Харин Өргөмжлөлийг тус сумын ИТХ-ын дарга К.Түмэн-Өлзийд өргөн барив.

Хутаг-Өндөрчүүд энэ өдөр цэцэрлэгийн багачуулаасаа эхлээд ахмад настан, акай буурлууд нь хүртэл шагналаа гардан авахаар сургуулийнхаа биеийн тамирын талбайд хуран чуулсан байлаа.

Шагнал гардуулах ёслолын ажиллагаанд Булган аймгаас сонгогдсон УИХ-ын гишүүд болох Ж.Бат-Эрдэнэ, Ц.Анандбазар нараас гадна Булган аймгийн ИТХ-ын дарга Д.Эрдэнэбат, аймгийн Засаг дарга Б.Ариун-Эрдэнэ, аймгийн Засаг даргын орлогч Д.Жаргалсайхан нар болон Булган аймгийн 14 сумын ИТХ-ын удирдлага, сумын Засаг дарга нар Хутаг-Өндөрчүүдэд хүндэтгэл үзүүлэхээр хүрэлцэн ирсэн юм.