Зуун буудалт даамын сонирхогчдын УАШТ-ний үеэр Орхон аймгийн Даамын холбооны тэргүүн Д.Доржпүрэвтэй уулзаж ярилцлаа.

-Манай аймагт анх удаагаа Сонирхогчдын зуун буудалт даамын УАШТ болж байна. Зуун буудалт даамын спорт манай аймагт хэр зэрэг хөгжсөн бэ. Энэ удаагийн тэмцээний онцлог нь?

-Улсын хэмжээнд яригддаг, дээгүүрт ордог спортын төрөл болох Зуун буудалт даамын сонирхогчдын Улсын аварга шалгаруулах тэмцээнийг Орхон аймагтаа зохион байгуулж байна. Орхон аймгийн Даамын холбоо жил бүр ажлын төлөвлөгөө гарган ажилладаг. Түүний  нэг нь аймагтаа анх удаагаа сонирхогчдын Зуун буудалт даамын УАШТ-ийг зохион байгуулах ажил болж байна. Бэлтгэл ажлаа сайн хангалаа, тэмцээн манай сайхан эхэлж байна.  Энэ тэмцээнд 8 наснаас 80 настай тамирчид оролцож байгаа. Нийтдээ 14 аймаг, 9 дүүргийн 100 гаруй тамирчин оролцож байна.

-Орхон аймгийн Даамын спортын түүхээс харвал  20 гаруй жилийн өмнө спортын цол, зэрэгтэй ганц нэгхэн тамирчин байжээ. Тэгвэл өнөөдөр 10 гаруй мастер, 40 гаруй дэд мастер байна. Энэ танхимд Орхон аймгийн бас нэг тамирчин Спортын дэд мастер боллоо. Даамын спортын сонирхогч хүүхэд багачуудад хандаж юу хэлэх вэ?

-Ер нь даамын спорт хөгжих боломж маш их. Ялангуяа энэ спортын онцлог нь хүүхдүүдийг тэвчээртэй болгодог. Сууж сургадаг гээд олон давуу тал бий. Оюуны спорт юм. Манай аймгийн хувьд энэ спортоор хичээллэдэг  зуу зуун хүүхдүүд бий. Цар тахлын өмнөхөн 2019 онд аймгийн Даамын холбоо өсвөрийн тамирчдынхаа дунд аварга шалгаруулах тэмцээн зохион байгуулсан. Зөвхөн тэрхүү тэмцээнд 340 гаруй хүүхэд оролцож байлаа. Манай холбооны зүгээс Даамын спортыг хөгжүүлж байгаа клубүүдтэйгээ хамтран ажиллаж байгаа. Тухайлбал, “Эрдэнэт” техникийн их сургууль дээр Зуун буудалт даамын спортоор дагнасан клуб ажиллаж  байна. Мөн манай холбооны зүгээс аймгийн Боловсрол, шинжлэх ухааны газартай хамтарч Зуун буудалт даамын спортыг сонирхож байгаа сурагчдыг бүртгэлжүүлэх гээд олон ажил зохион байгуулахаар төлөвлөөд байна.

-Та бүхэн орон нутагтаа Зуун буудалт даамын УАШТ-ийг хүлээн авч зохион байгуулж байна. Бэлтгэл хэр хангагдав?

-Зуун буудалт даамын УАШТ орон нутагт 5 дахь удаагаа болж байна. Аймаг, орон нутагтаа зохион байгуулахын тулд их ажил хийсэн. Аймаг, орон нутгийн удирдлага ч дэмжиж туслан, хамтран ажиллаж байна. Дараагийн тэмцээнийг Эрдэнэтэд зохион байгуулах гэвэл бараг 20 жил хүлээх байх шүү. Хүүхдүүдэд энэ спортыг таниулах, сурталчлах, тамирчдын чадварыг дээшлүүлэхэд тэмцээн уралдаан маш их үр дүн өгдөг. Тиймээс аймгийн Даамын холбооны зүгээс энэ чиглэлд анхаарлаа хандуулан ажиллаж байна. Дэлхий нийтийг хамарсан цар тахал намжиж байна. Сайхан цаг ирж байна. Иймээс хүүхдүүдийнхээ төлөө манай холбооныхон идэвх, санаачлагатай ажиллах болно.