Монголын рок, попын амьд домог болсон “Харанга” хамтлаг зургаадугаар сарын 11-нд Эрдэнэт хотноо тоглолт зохион байгуулах гэж байна. “Харанга”  хамтлагийнхан энэ удаад Эрдэнэт хотын Төв цэнгэлдэх хүрээлэнд “Энэ миний Эрдэнэт, эндээс соёлыг түгээцгээе” уриатай “GREATEST HITS” тоглолтоо аймгийн ЗДТГ хамтран зохион байгуулахаар болжээ.  Тоглолтод рок, попын одод оролцохын зэрэгцээ DJ HENZA, Комедиан Н.Амаржин нар оролцох юм байна. Тоглолтын тасалбарыг 8000-3235, 8806-2640 дугаарын утсаар авч болох ажээ. Бид бага үдийн алдад “Уурхайчин” соёлын ордноо тоглолтынхаа анонсыг байршуулж байсан “Харанга” хамтлагийн ахлагч Ц.Чулуунбаттай таарч  бичил ярилцлага авсан юм.

-“Харанга” хамтлаг маань хэдэн жилийн дараа Эрдэнэт хотноо аялан тоглох гэж байна вэ. Энэ удаагийн тоглолтыг хаанаас зохион байгуулж байна вэ?

-Эрдэнэт хотноо олон удаа ирж тоглож байсан. Эрдэнэт хот маань их, гоё соёлтой хот шүү дээ. Энэ удаа “Энэ миний Эрдэнэт, эндээс соёлыг түгээцгээе” уриан доор Харанга хамтлагийнхан “GREATEST HITS” тоглолтоо  аймгийн ЗДТГ-тай хамтран зохион байгуулж байна. Тоглолт зургаадугаар сарын 11-нд болно.

-Эрдэнэтийн үзэгчдэд, шүтэн бишрэгчдийн хувьд энэ удаагийн “GREATEST HITS”   тоглолт гэнэтийн бэлэг байлаа. Тоглолтын онцлог гэвэл та юу хэлэх вэ?

-“GREATEST HITS” нэртэй манай хамтлагийн тоглолтод рок, попын одод оролцож ая дуугаа өргөнө. Тоглолт маань зургаадугаар сарын 11-ний 18.00 цагаас 12-ны 01.00 цаг хүртэл үргэлжилнэ.

-Эрдэнэтчүүд цар тахлын улмаас томоохон тоглолт үзээгүй уджээ. Урлаг соёлоор бараг л цангаж байна. Эрдэнэтчүүддээ хандсан таны сэтгэлийн үг?

- “Энэ миний Эрдэнэт эндээс соёлыг түгээцгээе” уриан дор хамгийн жишиг хот болсон Эрдэнэтийнхэнээ урьж байна. “Харанга” хамтлаг болон Монголын рок, попын уран бүтээлчид Стадионы шоуг Эрдэнэтэд ирж тоглох гэж байна. Стадионы шоуны анхны гараагаа Эрдэнэт хотоос, эрдэнэтчүүддээ зориулж “Харанга” хамтлаг хийх гэж байна. Цаашдаа Рок, попын бусад хамтлаг, дуучид Эрдэнэт хотод хүрэлцэн ирж “Open Аir”  тоглолтыг хийгээсэй гэж хүсч байна. Анхныхыг нь эрдэнэтчүүдтэйгээ  хамтран зургаадугаар сарын 11-ний үдэш кохион байгуулна. Та бүхнийг өргөнөөр хүрэлцэн ирэхийг урьж байна. Тоглолтын анонсоо байрлуулчихлаа. Бэлтгэл ажил хангагдсан. Одоо эрдэнэтчүүдийгээ урих л үлдэж байна.  

-Та бүхэн Монгол орны аймаг, хотуудаар олон удаа аялан тоглолт хийж байсан. Эрдэнэт хот, эрдэнэтчүүдийн хувьд бусдаас юугаараа ялгарч харагддаг бол?

-Үнэхээр их ялгаатай шүү. Иргэд, залуус нь маш их соёлтай. Тэр тал дээр бусдаас яах аргагүй ялгаатай. Дээр нь Эрдэнэт хот үнэхээр цэвэрхэн үзз дээ. Ярих юм байхгүй.