Баянбулаг багийн Иргэдийн нийтийн хурал, Засаг даргыг сонгох сонгууль 2021 оны арваннэгдүгээр сард болсон. Багийн Засаг даргын сонгуульд тус багийн иргэн Д.Халтар олонхийн санал авч ялалт байгуулсан боловч Сонгууль зохион байгуулсан хүмүүс түүний нэрийг дээд шатны Засаг даргад нь уламжлалгүй удаасан. Иргэн Д.Халтарын зүгээс Авлигатай тэмцэх газар, Шүүхэд гомдол гаргасан байдаг. Шүүхээс иргэн Д.Халтарын нэхэмжлэлийг хангаж түүнийг Баянбулаг багийн Засаг даргаар захирамжлахыг Баян-Өндөр сумын удирдлагад даалгасан байна. Баян-Өндөр сумын Засаг дарга Б.Баасансүрэн зургаадугаар сарын 23-нд Б/36 тоот захирамж гарган Д.Халтарыг Баянбулаг багийн Засаг даргаар томилсон байна.

Д.Халтар өнөөдөр бага үдийн алдад ажлаа хүлээн авлаа. Баян-Өндөр сумын Засаг даргын орлогчоор ахлуулсан ажил хүлээлцэх комисс ажиллав. Ингэснээр 2021 оны арваннэгдүгээр сард Багийн Засаг даргын сонгуульд ялалт байгуулсан Д.Халтар Засаг даргын бүрэн эрхээ хэрэгжүүлэх болжээ.

Баянбулаг баг нь 2020 оноос хойш албан ёсны Засаг даргагүй, Засаг даргын үүрэг гүйцэтгэгчтэйгээр өнөөг хүртэл явж иржээ.