Аймгийн Засаг даргын даваа гарагийн шуурхай хуралдав. Энэ удаагийн шуурхайг Засаг дарга С.Батжаргал удирдан явуулав. Тэрбээр нэг хэсэг амралттай, албан томилолттойгоор БНСолонгос улс, ОХУ-д ажилласан. Сөрөг хүчний зарим нэг улс төрчид Засаг даргыг эзгүйд нь сураглаж, хаана юу хийж явааг нь хайж, эрэх нь халаггүй байсан удаатай. Тэгвэл Засаг дарга шуурхайдаа “эргэн ирж” ажилдаа орсон байна.

Наадам, Ардын хувьсгалын 101 жилийн ой гээд төр, засгийн ажил их байгаа ч аймаг орон нутагт бүтээн байгуулалтын ажил цаг, нартай уралдан хийж байна. Энэ талаарх мэдээллийг Хот байгуулалт, барилга захиалагчийн албаны дарга Ц.Баяржаргал  хийлээ. Тэрбээр,  2022 онд манай аймаг 55.2 тэрбум төгрөгийн 135 хөрөнгө оруулалтын ажлыг хийж гүйцэтгэхээр төлөвлөсөн. Үүний 75 нь орон нутгийн төсвөөр хийнэ. Харин улсын төсвийн хөрөнгө оруулалтаар 5 ажил хийх ёстой. Дээр нь Баян-Өндөр сумын ОНХС-ийн санхүүжилтээр 36, Жаргалантын ОНХС-ийн санхүүжилтээр 22 ажил гүйцэтгэхээр төлөвлөсөн. Зургаадугаар сарын 27-ны байдлаар нийтдээ 115 ажлын гэрээ хийсэн.  

Гэрээ нь хийсэн ажлуудыг төрлөөр нь ангилбал барилгын 10, авто замын 25, инженерийн шугам сүлжээний 23, тоглоомын талбайн тохижилт 33 ажил байна. Нийтдээ 8 нэр төрлийн ажил гэсэн үг. 
Аймаг, орон нутгаас хийж байгаа хөрөнгө оруулалтын ажлаас 1.3 тэрбум төгрөгийн төсвөөр гэр хорооллын 13 багийн гэрэлтүүлгийн тэжээлийн блок, толгой, кабел солих ажлыг 100 хувь гүйцэтгэсэн. Одоо гэр хорооллын  гэрэлтүүлгийн асалт 100 хувь боллоо.  Энэ ажлыг “Орхонтек” ХХК хийсэн.  Дээр нь орон нутгийн төсвийн  4 тэрбум 120 сая төгрөгөөр Баян-Өндөр сумын Цагаанчулуут багт таван давхар “Номын өргөө” цогцолбор барилгын бүтээн байгуулалтын ажлыг эхлүүлсэн. “Номыг өргөө” цогцолборыг энэ оны арванхоёрдугаар сард ашиглалтад оруулахаар “Шинжүү”ХХК ажиллаж байна. Мөн “Цагаанзуун” ХХК-ийн гүйцэтгэж байгаа инженерийн шугам сүлжээний ажил ид явагдаж байна. Үүнд, Наран багт 1143 м дулааны шугам, Рашаант багт 507.5 м  ус, дулаан дамжуулах шугам татаж байгаа.

Манай байгууллагаас 2021 онд 129 ажилд захиалагчийн хяналт хэрэгжүүлсэн. үүнээс он дамжсан 19 ажил байлаа. Эдгээрийн 10 нь санхүүжилтээс шалтгаалсан. Харин захиалагчаас шалтгаалсан 2, ковид цар тахлаас үүдэлтэй хил хааж, бараа материалын саатал үүссэн шалтгаанаар 5, гүйцэтгэгчээс шалтгаалан он дамжсан 1 ажил байгаа. 2022 онд хийх 135 ажлаас  зөвхөн энэ сард 79 ажил  дуусах хуваарьтай байгаа.  Харин ирэх долоодугаар сард 117 ажил буюу нийт ажлын 60.6 хувь нь дуусна. Наймдугаар сард  75.1 хувь буюу 145 ажил дуусахаар график, төлөвлөгөөний дагуу явж байна” гэлээ.  

.