Ийм ойлголтыг арваннэгдүгээр сарын 22-нд  хуралдсан аймгийн ИТХ-ын ээлжит хуралдааны үеэр эрдэнэтчүүд хүлээн авлаа. Аймгийн ИТХ-ын ээлжит хуралдаан 14 асуудал авч хэлэлцсэн. Төлөөлөгчдийн гаргасан саналын дагуу Эрдэнэтчүүдийн өвөлжилтийн асуудал хүндрэх төлөв үүсэн учраас мэргэжлийн байгууллагаас мэдээлэл авах, одоо байгаа бодит нөхцөл байдлыг талаар сонсохоор “Бусад” гэсэн асуудалд хамруулан ярилцлаа.

Эрдэнэт хотын Захирагчийн албаны дарга С.Ганцогт аймгийн хэмжээнд орон сууцны байрнуудын дулаан муу байгаа талаар, ямар арга хэмжээ авч байгаа тухай, Диспетчерийн үндэсний төвөөс  төвөөс барьж буй чиглэлийн талаар эхлээд танилцуулсан. Мөн тэрбээр цааш нь хэлэхдээ “манай аймгийн байшин хорооллын иргэдийг түгшээж байгаа дулаан, халаалттай холбоотой асуудлыг Эрдэнэтийн дулааны цахилгаан станц хувьцаат компани, Эрдэнэт ус, дулаан түгээх сүлжээ ОНӨ үйлдвэрийн газар хоёр л хариуцах тухай. Энэ хоёр мэргэлийн байгууллага хамтраад сайн ажиллавал дулаан алдагдлыг бууруулах, үүсэн нөхцөл байдлыг даван туулах боломжтой тухай дуулгалаа.

Энэ үеэр “Эрдэнэт ус, дулаан түгээх сүлжээ”-ний газрын ерөнхий инженер н.Содномцог хэлэхдээ “Арваннэгдүгээр сарын 1-20-ны хооронд манай байгууллагад 13540 дуудлага ирсэн. Үүний 2806-г нь бид хүлээн авч чадаагүй. 4 дуудлага хүлээн авагч ажилладаг ч яах аргагүй зарим дуудлагын авах техникийн боломж байхгүй. Өдөрт дунджаар 500-700 дуудлага ирдэг, Өнгөрөгч баасан гарагт гадаа нэлээн хүйтэрсэн. Тэр өдөр 1600 дуудлага ирсэн. Өнөөдрийн байдлаар манай байгууллагаас 5 инженер, 4 гагнуурчин, 10 засварчин дуудлага гарсан даруйд ажиллаж байгаа. Энэ орон тоог 2000 онд баталж, төсөв хөрөнгийг нь суулгаж өгсөн. Түүнээс хойш орон тоо нэмэгдээгүй. Бид боломжоороо ажиллаж байгаа. Дээр нь газар доорх инженерийн шугам сүлжээ их муудсан. Насжилт өндөртэй барилгын дулааны алдагдал их байна. Халаалт муу ирдэг газарт нь ялтсан бойлуур байрлуулах гээд ажил хийж байгаа” гэлээ.

Харин Хотын захирагчийн албаны дарга С.Ганцогт “аймгийн хэмжээний 108 байрны 15 нь дулаан, халаалтын хувьд хүндрэлтэй байгаа. Тэр дундаа 5 дугаар хорооллын 41 дүгээр байр хамгийн хүнд. Энэ байр дулаан алдагдал маш их. Магистрал шугам асуудалтай. Өнөөдөр л гэхэд Хотын захирагчийн албанд дулаан, халаалттай холбоотой 186 дуудлага ирсэн. Нөгөө талдаа иргэд цонхны дулаалгаа хийх, түүндээ анхаарах цаг болсон. Дуудлагаар яваад очиход гэрт нь тасалгаанд +20 хэм орчмын дулаан байхад цонхон дээр нь хасах 1 градустай, цонх нь онгорхой байдаг. Үүнийг нь хэлж, ойлгуулж байна. Дээр нь манай иргэд өрөөний температур+18 хэмийн байхыг хүлээн зөвшөөрдөггүй тал байна” гэсэн юм.

Аймгийн ИТХ-ын төлөөлөгч Д.Ганболд, В.Адъяа нар дулаан, халаалттай холбоотой асуулт асууж, саналаа илэрхийлсэн юм. Энэ бүхнээс харвал энэ өвөл эрдэнэтчүүдийн хувьд хэцүүхэн байх төлөвтэй байна.