Аймгийн ЗДТГ-ын дарга Ш.Ганболд хэвлэл мэдээллийн байгууллагынханд аймгийн ИТХ-ын ордны барилгын ажлын явцтай холбоотой мэдээллийг өгч, “тойрон аялал” зохион байгуулав.

Нэгдүгээр давхарт “Нэг цонхны үйлчилгээ” байсан өрөөг тохижуулж “Цахим Эрдэнэт”, “Дижитал Эрдэнэт” хөтөлбөрийн хүрээнд ТҮЦ машин болон томоохон банкуудын АТМ-ыг байршуулах гэнэ. Эдгээртэй холбоотой үйл ажиллагаа хариуцсан ажилтны өрөө мөн энд байх аж. Дараа нь бид “Тавинлан” компанийн барьж буй барилгын ажлын явцтай танилцлаа. Барилгын ажлыг эхлэхэд газрыг доош нь ухаж байсан. Энэ нь зоорийн давхар буюу аймгийн ЗДТГ, ИТХ-ын Ажлын албаны архивын зориулалтаар ашиглахаар төлөвлөжээ. Мөн түүний хажуугаар зоорийн давхарт 6-7 томоохон өрөө байна. Энд төрийн байгууллагын албан хаагчид сууж ажиллах гэнэ.

Хуучнаар Нутгийн удирдлагын ордны Хурлын их танхим хойшоогоо нэвт онгойдог хаалгатай аймгийн ИТХ-ын хуралдаан, бусад томоохон арга хэмжээг зохион байгуулах хурлын томоохон танхим байрлаж байна. УИХ-ын хуралдааны танхимыг дууриалган хагас зуйван хэлбэрээр, хоёр шатлал бүхий байдлаар тохижуулж байна. Нийтдээ 3 тэрбум төгрөгийн түлхүүр гардуулах нөхцөлтэй тендэрт “Тавинлан” компани ганцаар оролцон шалгарч барилгын ажил зургаадугаар сараас эхэлсэн бүтээн байгуулалт энэ онд ашиглалтад орох ёстой. Ш.Ганболд даргын мэдээллээс харвал Тавинлангийнхан гэрээний хугацааг он дуустал хойшлуулах хүсэлтээ гаргаад байгаа гэнэ. Одоогоор гэрээг нь сунгаагүй байгаа аж. Мөн барилгын материалын үнийн хөөрөгдөл, хил гаалийн асуудал зэрэг тодорхой шалтгааны улмаас хөрөнгө оруулалтыг нэмэгдүүлэх саналаа гүйцэтгэгч компани гаргажээ. Маргааш хуралдах аймгийн ИТХ-ын ээлжит XIII хуралдаанаар барилгын ажилд шаардлагатай нэмэлт санхүүжилт болох 1 тэрбум төгрөгийг 2023 оны төсөвт суулгахаар болсон байна. Зоорийн давхартайгаа нийлээд бараг гурван давхар, нийт  783 метр кв талбай бүхий барилга юм.  

Ямар ч байсан барилгын ажил ид өрнөж байна. Ажлын явцаас харвал “Эрдэнэт хотын өдөр” буюу арванхоёрдугаар сарын 11-нд бүү хэл энэ ондоо амжиж орох нь эргэлзээтэй санагдсан. Хурлын шинэ ордонтой болсноор сэтгүүлчид шатан дээр сууж байгаад, эсвэл хана налж зогсоод өвдөг дээрээ дэвтрээ тавиад мэдээгээ бичдэг, тэмдэглэлээ хөтөлдөг байдал түүх болон үлдэх төдийгүй ажиллах орчин нөхцөл дээрдэнэ гэдгийг Тамгын газрын дарга онцоллоо.

Аймгийн ИТХ-ын төлөөлөгчдийн хувьд “ум зандан ширээ” нь байг гэхэд шил толь болсон шинэхэн ширээн дээрээс хуралдаа оролцож ажиллах орчин нөхцлөө дээрдүүлэх нь “тойрон аялал”-ын дүр зургаас харагдаж байлаа.

Нэгэн цагт аймгийн ИТХ-ын хуралдаан дээр дарга Д.Мөнхбат “Бидэнд хурлын заалаа өргөтгөх, томруулах зайлшгүй шаардлага үүссэн. Хэмнэлтийн тухай ярьж байгаа ч би арыг нь даана. Ямар ч байсан Шинээр хурлын ордонтой болно” гэсэн амлалт ажил хэрэг болоход ойртжээ. Харин төсөвт өртөг нь тодорхой шалтгаанаас үүдэн 4 тэрбум төгрөгт хүрч байгаа ажээ.