Орхон аймгийн төр, захиргааны байгууллага, “Уурхайчин” соёлын ордны өмнөх талбай буюу өнөөгийн нэрээр А.Амарын талбай машин дүүрэн зогсоол болсон байсан нь саяхан. Орхон аймгийн өнөөгийн төр, захиргааны байгууллага хоёр жилийн өмнө энэ талбайг машинаас чөлөөлж Эрдэнэтийн ард иргэд амгалан байх, амар тайван алхах нөхцөлийг хангасан. Аливаа хотын төв талбай иргэдийн эрх чөлөөний талбар байдаг дэлхийн тэр л жишиг рүү оруулж аймгийн Засаг дарга захирамж гарган, Эрдэнэтийн төв талбайг машинаас чөлөөлсөн нь тэр. Үнэхээр оновчтой зөв шийдвэр болсныг өнөөгийн байдал нотолж байна. А.Амарын талбайд одоо бага насныхан дугуйгаар зугаалж, усан санд завиар аялаж, галт тэргэнд сууж, багачууд өнгө алагласан хийн тоглоом дээр үсэрч тонгочин баясаж, сургуулийн хүүхдүүд сагсан бөмбөг тоглож, зарим нь сургуулийн дунд насныханд дугуйн прокатаар үйлчилж, охид хөвгүүд зун нь рольк, өвөл нь чарга, тэшүүрээр гулган наадаж, өндөр настнууд сандал дээр тухлан хууч хөөрч суугааг харахад энэ талбайгаас хүний жинхэнэ амар амгалан байдал, эрх чөлөө мэдрэгдэх болжээ. Өндөр настнууд өглөө их эрт ирж энд хийн дасгал хийж харагдана. Саяхан А.Амарын талбай төв зам хоёрыг зааглан сайхан алаг чулуун зам тавьчихлаа. Эрдэнэтийн иргэдийн эрх чөлөөний талбар болсон энэ талбай руу өнөөдөр машинтайгаа зүрхэлж орох хүнгүй болсон нь том ололт. Тиймээс энэ талбайд хүмүүс айх аюулгүй, амар тайван алхах болжээ. Орхон аймгийн төр, захиргааны байгууллага олон түмний тав тух, амар амгалан байдлыг хангах олон шинэчлэл хийж байгаагийн нэг жишээ энэ юм. Монгол улсын анхны Ерөнхий сайд агсан А.Амарын хөшөөг өнгөрсөн жил нүүлгэн Нутгийн удирдлагын ордны өмнө аваачиж байрлуулан, өмнө нь “Найрамдал” гэдэг байсан төв талбайг “А.Амарын талбай” хэмээн нэрлэсэн нь хүртэл гүн утга төгөлдөр үйл ажиллагаа болсон юм. Эх орны тусгаар тогтнол, ард түмнийхээ амар амгалангийн төлөө эрдэм боловсрол, хүч чадал, амь насаа зориулсан Ерөнхий сайд агсан А.Амарын гэгээн дүрийг Булган хангайд бууриа зассан айл өрх, хүн бүхэн бахархан хүндэтгэх учиртайг сануулан ийнхүү гэгээн дүрийг нь Эрдэнэтийнхэн мөнхжүүлэн бүтээж, хоймроо залсан билээ. Одоо А.Амарын талбайг сайхан тохижуулах л үлдэж байна. Эхний удаад уг талбайг машины зогсоол болсон байдлаас чөлөөлнө, дараа нь засаж шинэчилнэ гэсэн сайхан санаагаа төлөвлөгөө болгон хэрэгжүүлэхээр ажиллаж буй хүмүүс бий. Тэдний сайн санаа биелэлээ олж бүтээлч ажил болсны дараа Эрдэнэтийнхэн үзэмж төгс, өнгө гялбам сайхан талбайтай болно гэдэгт эргэлзэхгүй байна. Тэр шинэчлэл даруй хийгдээсэй гэж Эрдэнэтийнхэн хүлээж сууна даа. Сэтгүүлч Ж.ОЮУН