“Эрдэнэт үйлдвэр” ТӨҮГ-ын залуусын сайн дурын үндсэн дээр бий болсон “Cu Mo” клубын  10 жилийн ой тохиож байна. “Cu Mo” клубын залуус 10 жилийнхээ ойн хүрээнд  Хот тохижуулах газрын  зам талбайн ажилчдад халуун чацарганаар үйлчилж амны хаалт түгээлээ. Мөн ажилчдад шинэ жилийн бэлэг гардуулсан нь энэ өдөр ажлаа хийж байгаа тэдний хувьд гэнэтийн бэлэг байлаа.

Хот тохижуулах газрын дарга Д.Оюунбаяр “Өнөөдөр хүйтэн, зэврүүн байна. Халуунд халж хүйтэнд хөрч явдаг манай байгууллагын ажилчдад гэнэтийн бэлэг барьсан энэ клубын залуустаа үнэхээр их баярлалаа. Хэдийгээр өнөөдөр Эрдэнэт хотын өдөр тохиож байгаа ч манай ажилчид ажлаа хийж байгаа. Тэдэнд халуун чацаргана, шинэ жилийн бэлэг түгээсэн нь манайхны сэтгэлийг сэргээсэн сайхан үйл явдал боллоо. Cu Mo клубын хамт олны цаашдынх нь ажилд  өндөр амжилт хүсэн ерөөе” гэлээ.

 “Cu Mo” клубынхэн гэр хорооллын худгуудаар явж усаа авч байгаа багачуудад шинэ жилийн бэлэг тараасан юм. Худгаас усаа аваад явж байсан жаахан хүү “Өнөөдөр шинэ жил болж байгаа юм уу” хэмээн баярлаж байхав. Усны тэргэн дээр 60 литр ус түрж яваад шинэ жилийн бэлэг гардсан өвөө “Өнөөдөр хишиг өдөр юм байна шүү” гээд инээд алдах нь “Cu Mo” клубын залуусын 10 жилийн ойнхоо хүрээнд хийж буй энэ”гэнэтийн бэлэг” нүдээ олсон арга хэмжээ байлаа.