“Түлхүүр гардуулах нөхцөлтэй” гэрээгээр баригдаж байгаа аймгийн ИТХ-ын Ордон тун удахгүй ашиглалтад орох гэж байна. Баасан гарагт Барилга байгууламжийг хүлээн авах улсын комисс хуралдсан юм. Өмнө нь бас хуралдаж байжээ. Тухайн үед цонхноосоо сийгдэг буюу дулаан алдагдал байсныг гүйцэтгэгч “Тавинлан” компанийнхан засч янзалсан гэдгээ тайлбарлав.

Баасан гарагийн Улсын комиссын хуралдаанаар багагүй асуудал дутуу дулимаг байгааг комиссын гишүүд шүүмжилж байлаа. Тухайлбал, хөгжлийн бэрхшээлтэй иргэдийн холбооны төлөөлөл н.Мөнх-Эрдэнэ “Гадна орчноос байр луу ороход тэргэнцэртэй иргэний налуу зам байна. Харин дотор ороод харвал Хурлын хуралдааныг ажиглах, цаашлаад тэргэнцэртэй иргэн аймгийн ИТХ-ын төлөөлөгч болвол дотогш  орох боломжгүй байна. Үүнийг шийдэж болоогүй юм уу” хэмээн асуухад  гүйцэтгэгч тал болох “Тавинлан” компанийн төлөөлөл “Зураг төсөв дээр налуу шат байна гэж тусгаагүй учраас хийгээгүй” хэмээн тайлбарлав.

Нэг талаас харахад үнэхээр сайхан Орд өргөө мэт харагдавч төлөөлөгчдийн ширээний микрофоны цуурай нь тохиргоогүй, шилэн кабелийн холболт энэ тэр дутуу гээд олон асуудал цухалзаж байлаа.

Түлхүүр гардуулах нөхцөлтэй гэрээний төсөв өртөг өнөөх л цар тахал, үнэ ханшийн өсөлтөөс болоод 2023 оны төсөвт 1.1 тэрбум төгрөг суусан. Мөн гэрээн дээр 3 жилийн хугацаанд гүйцэтгэгч тал гарсан эвдрэл гэмдэл зэргийг засах үүрэгтэй. Энэ үүргээ мартаад алга болчихгүй юм байгаа биз дээ хэмээн аймгийн Засаг даргын орлогч А.Түвшинжаргал ам асууж байлаа. Ямар ч байсан ИТХ-ын Ордон тун удахгүй ашиглалтад орж төлөөлөгч нар “зандан модон ширээ”-н дээрээ залрах цаг ойртжээ.