Орхон аймгийн иргэдийн хувьд А1001 авто зам, Гурван зам дээр байх “Төлбөр хураах цэг” нэртэй Зам, тээврийн яамны харьяаны, 1000 төгрөгийн боловсон дээрэм хийдэг энэ нэг “объект” үнэндээ ядаргаа болдог. Орхон аймгийн иргэн атлаа хөдөөгийн ганц сум болох Жаргалант сум ороод ирэхэд 2 талдаа тус бүрдээ 1000 төгрөг төлдөг нь эрх баригчдын амьдралаас тасарсан шийдвэрийг иргэд үнэхээр үзэн яддаг.

ОРА дугаартай машин унасныхаа төлөөсийг өгөөд байгаа юм уу, Жаргалант сум руу очиход заавал Эрдэнэтийнхэн хоёр талдаа тус бүрдээ 1000 төгрөг төлөх ёстой гэсэн Засгийн газрын тогтоол байдаг уу бүү мэд. Энэ асуудлыг өнгөрсөн хугацаанд шийдчихсэн УИХ-ын гишүүн, Засгийн газрын гишүүн хоншоортой аавын хүү даан ч гарсангүй. Хэрвээ тийм хүн байсан бол ирэх оны сонгуульд Эрдэнэтийн жолооч нар 2 гараа өргөөд сонгоход ч бэлэн байгаа.

Аргаа барахдаа аймгийн Засаг дарга С.Батжаргал иргэдийнхээ “зовлонг” нимгэлж, санал хүсэлтийг шийдвэрлэхээр шийдэж Төлбөр хураах цэгийг нүүлгэх зардал болох 200 сая төгрөгийг аймгийн төсөвт суулгасан байна. Ингэж иргэдийнхээ үгийг сонсдог, асуудлыг шийдэж чаддаг аймгийн Засаг даргадаа иргэд талархаж байна. Төлбөр хураах цэгийг нүүлгэх ажил тун удахгүй өрнөх гэнэ.