Олон улсын эрх зүйн хөгжлийн байгууллагын Монгол дахь суурин төлөөлөгч Стивен Кент болон бусад холбогдох албаны хүмүүсийг  өнөөдөр Засаг дарга С.Батжаргал  хүлээн авч уулзлаа. 
Олон улсын эрх зүйн хөгжлийн байгууллага нь тогтвортой хөгжил болон хууль дээдлэх ёсыг бий болгохын төлөө дагнан ажилладаг Засгийн газар хоорондын олон улсын байгууллага гэх мэдээллийг уулзалтын эхэнд ноён Стивен Кент өгсөн. 

Монгол улсын Засгийн газрын хэрэгжүүлэгч агентлаг Гэр бүл хүүхэд залуучуудын хөгжлийн газар, Олон улсын эрх зүйн хөгжлийн байгууллагатай хамтран Европын холбооны санхүүжилтээр “ХҮҮХЭД ХАМГААЛЛЫН ТОГТОЛЦООГ БЭХЖҮҮЛЭХ” төслийн хүрээнд “Хүүхдийн эрхийн хууль зүйн хорооны кейс менежментийг сайжруулах менторын хөтөлбөр”-ийг 11 аймаг, 2 дүүргийн хэмжээнд хэрэгжүүлж байгаа. 

Дээрх 11 аймгийн нэг нь Орхон аймаг, Эрдэнэт хот юм. Уулзалтаар уг хөтөлбөрийг хэрэгжүүлэх арга зам, хүрэх үр дүнгийн талаар санал солилцлоо. 

Ментор хөтөлбөр хэрэгжсэнээр хүүхдийн эрхийн Хууль зүйн хорооны гишүүд хэрэг хянан шийдэх явцад гэмт хэргийн холбогдогч, гэрч хохирогч болсон болон хорихоос өөр төрлийн ял шийтгэл эдэлж буй насанд хүрээгүй иргэнд үзүүлж буй үйлчилгээний чанар хүртээмж сайжирч, кейс шийдвэрлэлтийг эрчимжүүлж дэмжлэг үзүүлэх, зөвлөн туслах чадвартай мэргэжилтэн бэлтгэгдэнэ.  Тус байгууллагаас Монгол Улсад гурван төсөл хөтөлбөр хэрэгжүүлж байгаагийн нэг нь дээрх төсөл юм. 

Мэдээллийн төв