Манай аймгийн хувьд “Тэрбум мод” үндэсний хөдөлгөөний хүрээнд 20 сая мод тарьж, ургуулна. Үүнийхээ 20 хувийн тарьц, суулгацыг аймгийн Сум дундын ойн ангийн Мод үржүүлгийн газраас хангах томоохон зорилт тавьж ажил хэдийнэ эхэлсэн байгаа. Эл байгууллага нь иод үржүүлгийн 3.5 га талбайд 6х20 хэмжээтэй 11 хүлэмжинд 11 төрлийн мод, бут тарьж ургуулж байгаа аж. Жилдээ 50 ширхэг тарьц, суулгац нийлүүлдэг байсан бол өнгөрсөн оноос суулгацын хэмжээ 150-200 мянганд хүрсэн байна.

Бүх нийтээр мод тарих ажлын хүрээнд энэ онд  

•  Жаргалант сумын Хонгор морьтын амны ойн санд 48 га талбайд 110 мянган ширхэг мод тарина.
• Ойг нөхөн сэргээх төслийг хэрэгжүүлэхээр Олон улсын байгууллагатай хамтран ажиллаж байна. Хөшөөтийн даваанаас Гурван замын уулзвар хүртэл авто зам дагуу 476 мянган ширхэг мод тарина. 
• Согоот уулын ойн санд 605 мянган ширхэг мод, 
• Говилын төмөр замын гарамнаас Хангал гол дагуу 40 га-д 3 сая мод, 
• Газар  тариалангийн хөрс хамгаалах, ойн зурвас 18,2 мянган ширхэг модыг “Эрдэнэт үйлдвэр” ТӨҮГ, 
• Хаягдлын далан орчим, цагаан тоосны дэгдэлтийг сааруулах ойн зурвас үргэлжлүүлэн байгуулах ажилд 500 мянган ширхэг модыг мөн Эрдэнэт үйлдвэр ТӨҮГ-тай хамтран хэрэгжүүлнэ. 
• Хот орчимд  ногоон төгөл  бий болгох зорилтын хүрээнд Гурван зам, Тарлан толгой, Сархиа уул орчмын 15 га талбайд 2500 ширхэг мод тарихаар төлөвлөжээ. Ингэснээр 2023 онд  нийтдээ 1200 га талбайд 4.7 сая ширхэг модыг хаврын тариалалтаар төр, хувийн хэвшил иргэдийн оролцоотой тарина.