Амарын талбайд төрийн байгууллагуудын “Нээлттэй хаалганы өдөр” гурав дахь хоногтоо үргэлжилж байгаа. Дээр нь хаврын мод тарилтын хүрээнд энэ сарын 10-наас үзэсгэлэн худалдааг эл газар зохион байгуулж буй. Өнөөдөр л гэхэд Хот тохижуулах, Эрдэнэт ус, Эрдэнэт Булганы түгээх гээд 10 шахам байгууллагын өдөрлөг болсон.

Хот тохижуулах газрынхан парк шинэчлэлтийн хүрээнд орон нутгийн татвар төлөгчдийн мөнгөөр худалдан авсан зарим нэг техникээ Амарын талбайн зүүн урд талд байршуулсан. Гэтэл замын цагдаа гүйж ирээд хөөж байхыг харлаа. Юу гэнэв ээ, “Амарын талбайд аймгийн Засаг даргын захирамжаар автомашин тавихыг хориглодог. Наад машинаа гарга” хэмээн шаардаж байна. Инженер нь бололтой залуу ч эр бяраа үзүүлж шаардах нь тэр. Эрдэнэт усын шар машин нэлээн хойнон байсан. Түүнийг гар гэж хөөх нь гэж хартал зөвхөн Хот тохижуулахын 3 машиныг хөөгөөд сүйд ээ.  

Тэгэж яривал Амарын талбайд Аймгийн Засаг даргын захирамжаар төрийн болон төрийн үйлчилгээний байгууллагууд “Нээлттэй хаалганы өдөр”-ийг зохион байгуулж байгаа юм шүү. Аймгийн ЗДТГ-ын Хууль зүйн хэлтсийнхэн үүнд нэг анхаарлаа хандуулбал яасан юм бэ. Аймгийн Засаг дарга захирамж гаргачихаад бас нэг захирамжаараа өмнөхөө зөрчөөд байгаа хэрэг үү.

Бас болоогүй ээ, “Нээлттэй хаалганы өдөр”-өөр төрийн үйлчилгээ авах гэсэн иргэд олон байлаа, тэр дундаа авто машинтай хүмүүс. Аргаа барахдаа Амарын талбайд боломжоороо машин тэргээ тавьсан. Гэтэл замын цагдаа нар дугаарыг нь шүүгээд жолоочын утсыг нь олж залгаад “Машинаа гарга” хэмээн дарамтлаастай. Аймгийн ЗДТГ, “Соёл урлагын цогцолбор“-ыг тойроод машин тавих нь бүү хэл түгжрээд л. Замын цагдаа нар хөл хөдөлгөөн ихтэй үед гарцаар гарч байгаа иргэдэд тусдэм болохын оронд хүч нэмэгдүүлээд, дуу дохиогоо хангинуулаад л ... Энэ арай л биш байна.