Аймгийн ИТХ-ын тэргүүлэгчдийн ээжилт хуралдаан боллоо. Энэ удаагийн хуралдаанаар  аймгийн ИТХ-ын ээлжит 18 дугаар хуралдааны бэлтгэл хангасан дүнгийн тухай, Орхон аймгийн Боловсролын салбарыг хөгжүүлэх хөтөлбөрийн биелэлт, цаашид зохиох ажлын тухай, Аймгийн нутгийн өөрөө удирдах байгууллагын үйл ажиллагааны өнөөгийн байдал, түүний шалгуур,  хэмжүүр бий болгох тухай, Баян-Өндөр сумын Малчин багийг өөрчлөн Жаргалант суманд шилжүүлэх тухай, Албан татвар тогтоох тухай, Багуудын хилийн цэсийг шинэчлэн тогтоох тухай, Бусад гэсэн 7 асуудал хэлэлцсэн юм. Аймгийн ИТХ-ын тэргүүлэгчдийн ээжит хуралдаанд хурлын дарга Б.Мягмарсүрэн, тэргүүлэгч Д.Батхуяг, Д.Доржпүрэв, Ж.Ганчимэг, Т.Соёл-Эрдэнэ, Ш.Ганбат нар хүрэлцэн ирсэн хурлын ирц 54.5 хувьтай байв. Хурлын тэргүүлэгчдийн зүгээс Орхон аймгийн боловсролын салбарыг хөгжүүлэх хөтөлбөрийн биелэлт, цаашид зохиох ажлын талаар нэлээн нухацтай авч үзсэн юм. Нутгийн өөрөө удирдах байгууллагаас боловсролын салбарын шинэчлэлийн хүрээнд олон ажил хийж түүний дагуу тодорхой үр дүнд хүрч байгаа ч зарим нэг асуудалд аймаг өөрийн гэсэн нэгдсэн бодлого, ойлголттой болох нь зөв гэсэн саналыг гаргаж байв. Тухайлбал, Боловсролын салбарыг хөгжүүлэх хөтөлбөрийн хүрээнд манай аймагт ажиллаж байгаа их, дээд сургуулийн ирээдүйн хөгжил, хэтийн чиглэлийн нэгдсэн бодлого байхгүй. Их, дээд сургуулиудын хувьд дээрээ шууд удирдлагатай учраас аймгийн боловсрролын салбарыг хөгжүүлэх хөтөлбөрт саналаа тусгадаггүй тал байдаг. Үүнийг цаашид ямар арга замаар өөрчлөх, тэдний санал хүсэлтийг сонсох талаар ярилцлаа. Мөн ерөнхий боловсролын сургууль тэнд ажиллаж байгаа багш ажилчдаас гадна суралцагчдын эрүүл мэндийн талаар, суралцах эрүүл таатай орчин нөхцөл бүрдүүлэх тухай ч  энд хэлэлцлээ. Тухайлбал, өнөөдөр цогцолбор сургуулийн ариун цэврийн зардал буюу бидний нэрлэдгээр саван, бооконд сардаа 30-35 мянган төгрөг төсөвлөдөг нь хаанаа ч хүрдэггүй тухай яригдсан юм. Өөрөөр хэлбэл, яамнаас урсгал зардлыг нь маш ихээр танадаг тул зохих стандартын дагуу тэр бүү хэл мэргэжлийн хяналтын эрүүл ахуйн байцаагчийн шаардлагын хүрээнд ч ажиллахад хүндрэлтэй байдаг талаар хөндөгдсөн. Мөн энэ сарын 18-нд хуралдан аймгийн ИТХ-ын ээлжит 18 дугаар хуралдаанаар Баян-Өндөр сумын Малчин багийг Жаргалант суманд шилжүүлэх тухай асуудал яригдлаа. Газар нутаг, малын бэлчээр гээд олон асуудлын улмаас Малчин багийг Жаргалант суманд шилжүүлэх нь зөв гэсэн шийдэлд нутгийн удирдлагууд хүрч байгаа аж. Н.Төр