Есдүгээр сарын 16-ны 18.00 цагийн үед Евро эко хорооллын барилгын газар шорооны ажил хийж байсан ажилчдын нэг нь шороонд дарагдан амь насаа алдсан харамсалтай хэрэг гарчээ. Бүр тодруулбал, есөн давхар хоёр барилгын сантехникийн шугам сүлжээний ажлыг гэрээний дагуу гүйцэтгэж байсан Улаанбаатар хотын “Напсон”компанийн ажилтан шороонд дарагдан амиа алдсан байна. Хэрэг гарах үед ойр орчимд нь байсан иргэдийн яриагаар сангийн хоолой тавих гэж бульдозер нүх ухаж түүн дотор нь ажиллаж байсан хүний дээрээс шороо нуржээ. Тэр даруйд нь Онцгойгийнхон, цагдаагийнхан ирсэн ч шороонд дарагдсан хүнийг гаргах гэж багагүй хугацаа алдсан бололтой. Чех улсын хөрөнгө оруулалтаар Барилга хот байгуулалтын яамны захиалгаар баригдаж байгаа Евро эко хороолол Эрдэнэт хотноо 7А хороолол гэсэн албан ёсны нэртэй бүтээн байгуулалт өрнөж эхэлснээр хоёр жил болж байна. Энэ хорооолын сантехникийн шугам сүлжээний ажлыг Улаанбаатар хотын “Напсон” компани гэрээний дагуу гүйцэтгэж байсан аж. Бид хэргийн талаар аймгийн Цагдаагийн газрын Мөрдөн байцаах тасгийн дарга А.Лхагвадоржоос тодруулах гэсэн боловч “Хэргийг шалгаж байхад юуг нь тодруулдаг юм бэ. Би юу ярих вэ” гэсэн татгалзсан хариу өгсөн юм. Харин Мэргэжлийн хяналтын газрын Хөдөлмөр эрүүл ахуйн хяналтын улсын байцаагч Г.Батцэцэг “Их хаадын цуваа компанийн барьж байгаа 7А хорооллын барилгын сантехникийн шугам тавих ажил хийж байх явцад хүн шороонд дарагдан нас барсан үйлдвэрлэлийн осол гарсан. Одоо бид гүйцэтгэгч компанийн удирдлагыг дуудаад тусгай зөвшөөрөл, ажлын гэрээтэй нь танилцах гэж байна. Компанийн зүгээс хөдөлмөрийн аюулгүй ажиллагааны инженер нь ослын дүгнэлтээ гаргаад 72 цагийн дотор бидэнд ирүүлнэ. Бид шалгаж үзээд ослын акт тогтоож, үйлдвэрлэлийн осол мөн биш болохыг нь тогтоодог” гэлээ.