Аймгийн Статистикийн хэлтсийн мэргэжилтэн ажлаа хийж яваад бусдын гарт амиа алдсан харамсалтай хэрэг гарлаа. Цэл залуухан бүсгүйн зургийг аймгийн захиргааны нэгдүгээр давхарт байрлуулжээ. Хүн амын хөгжил, нийгмийн хамгааллын яамны захиалгаар хийгдэж байгаа судалгааны ажлаар Цагаанчулуут багийн айл өрхөөр асуулга авахаар энэ долоо хоногийн даваа гаригийн орой 17 цагийн үед ажилтан бүсгүй нэгэн айлд орсон байна. Хэргийг үйлдсэн залууг сэтгэцийн өөрчлөлттэй гэж байгаа ч төрийн албан ажил хийж яваа ажилтныг олон удаа хутгалж, аминд нь хүрсэн энэ үйлдлийг “хэрэг хүлээх чадваргүй нэгэн үйлджээ” гээд орхиж боломгүй санагдаж байна. Айл өрхөөр асуулга авахаар орох үед тухайн багийн захиргаатай холбогдож, оршин суугаа айл өрхийн талаар мэдээлэл авсаны дараа айлын хаалгыг тогшихгүй бол энэ мэтээр зэрлэг балмад этгээд хаалганы цаана сууж байгааг таахад бэрх юм. Нэг талаар энэ хэрэг төрийн нэр хүнд иргэдийн дунд хэчнээн унасныг илтгэх шиг. Хүн амын хөгжил, нийгмийн хамгааллын яамны төлөөлөл Орхон аймагт ирж, дээрх зэрлэг балмад хэргийн талаар асууж тодруулж байгаа юм байна. Учир нь яамны захиалгаар аймгийн Статистикийн хэлтсийн ажилтан албан үүргээ гүйцэтгэж яваад амь насаа алдсан учир хохирлыг яамны зүгээс хариуцахаа мэдэгджээ. Хамгийн сэтгэл шимшрэм эмгэнэл нь талийгаач бүсгүйн ард арван настай хүү, 80 настай азай буурал аав нь үлдэж байгаа. Аймшигт аллага үйлдэгч хэрэгтний талаар түүний аав “Би шөнө бүтэн нойртой хонож чаддаггүй. Хүү маань хэзээ босч ирээд намайг алчих бол” гэж айж явдагаа ярьсан байна. Хүн гаднаас нь харахад, хэн ч сэтгэцийн өөрчлөлттэй гэж хэлэхээргүй энгийн нэгэн харагддаг хэмээн эх сурвалжууд ярьсан ч бидний дунд яаж ч мэдэх хүн дүрстэй араатнууд олон байгааг энэ хэрэг сэрэмж өгч байна. М.Мөнх