Хотын төвдөө хоёр давхар нийтийн жорлонтой аймаг, манайхаас өөр хаана ч байхгүй болох нь. Үйлчилгээний төвийн зүүн талд байх ногоон байгууламж дотор энэ зун цэнхэр хашаа барьснаар багагүй хугацаа өнгөрсөн. Саяхнаас сураг тавихад, тэнд хоёр давхар нийтийн жорлон, эерүүлж хэлбэл нийтийн бие засах газар байгуулж буй ажээ. Манай дарга нар орон нутгийн төсвөөс нийтдээ 132 сая төгрөгөөр ийнхүү иргэддээ зориулж жорлон барьж өгч байна. Энүүхэндээ гэхэд шилэн данс, мэдээллийн ил тод байдал, хийж буй ажлынхаа талаар ярьж хэлэх нь тун бага. Ямар сайндаа л төрд ажилладаг нэг хурган дарга “Энэ газар дээр ямар том мотортой хүн барилга барих эрх авчихав. Чадалтай эр байх нь ээ” гээд суудал дээрээ өндөлзөж байсан удаатай. Тэгвэл энэ газар дээр ямар нэг том дарга хаус бариагүй, жорлон барьж байгаа тухай мэдээлэл дуулдлаа. 100 гаруй мянган хүн амтай манай хотод нийтийн бие засах газар хэрэгтэй юу гэвэл бүгд л тийм гэнэ. Стандартаар бол манай аймагт бараг 20-30 нийтийн бие засах газар хэрэгтэй. Гэхдээ өнөөдрийнх шиг 132 сая төгрөгөөр хоёр давхар жорлон барина гэвэл 3.6 тэрбум төгрөг хэрэг болно. Тэгээд ч заавал ногоон байгууламж дээр барих шаардлага байгаа юу. Ногоон байгууламжаас хүчилтөрөгч ялгардаг. Нийтийн бие засах газраас юу үнэртэх вэ. Өмнө нь манай дарга нар энд тэнд ганц нэг жорлон бариулсан. Даан ч ажиллахаасаа ажиллахгүй нь их. Иргэдийн дунд ийм нэг яриа байдаг. “Нарантуул” захын босс Ч.Сайхансамбуу жорлонгоосоо өдөрт 1-2 сая төгрөг олдог тухай. Үнэхээр нийтийн бие засах газрыг зөв газар нь барих юм бол орлогоороо зардлаа нөхөөд биеэ даагаад явчих боломжтой. Гэтэл өнөөдрийн энэ газар дээр байх жорлон бол арай л биш харагдаад байх шиг. Үйлчилгээний төв дотор нийтийн бие засах газрууд бий. Түүгээр үйлчүүлсэн хүмүүс тэнд л ордог. Түүнээс биш би хоёр давхар жорлонд очиж орно гэж “тэнэгтэх” эрдэнэтийн иргэн хэд байх бол. Тэгээд ч тийм үнэтэй жорлон зардлаа хэзээ нөхөж, хэзээнээс ашигтай ажиллах вэ гэсэн асуулт өөрийн эрхгүй төрж байна. Давхар жорлон барьж байхаар энд тэнд авсаархан жижиг Эко бие засах газар олон байвал илүү тохиромжтой. Гэхдээ үүний цаана өөр зориулалтаар ашиглах санаа явж байх магадлалтай.