“Цэцэрлэгийн багачуул хоолондоо цадахгүй өлсөж байна, хүүхдийн тоо нь нэмэгдээд түүнийхээ хэрээр хоол нь багасаад орой гэртээ ирэхдээ бүтэн талх идэхээс наахнуур байна, манай хүү. Харин тийм ээ, манай охин ч өмнө нь гайгүй байсан энэ жилээс ээж ээ би аймаар өлсөж байна гэсээр гэртээ ирэх боллоо” гэсэн хоёр ээжийн халуун яриаг сонсоод арай л нүд орой дээрээ гарсангүй. Тэдэнд чинь төрөөс хоолны мөнгө гэж өгч байгаа шүү дээ, энэ хоёр хүн ч арай дэндүүлж байна аа гэж бодоод л өнгөрсөн. Гэтэл бодит байдал дээр үнэхээр цэцэрлэгийн хүүхдүүд хоолондоо цаддаггүй, өлсдөг юм байна. Өнөөдөр цэцэрлэгийн нэг хүүхдийн өдрийн хоолонд улсаас 1650 төгрөг өгдөг. Бодоод үз дээ, таныг эсвэл намайг 1650 төгрөгөөр нэг өдрийн өл даагаарай гэвэл ёстой нэгийгээ үзэж нэхий дээлээ уралцах байлгүй. Хэдийгээр хүүхэд ч гэсэн бодит байдал дээр 1650 төгрөгөөр нэг өдрийн өл даана гэвэл арай л дэндүү санагдана. Цэцэрлэгийн хүүхдүүд өглөө ирээд каш эсвэл цагаан будаа иднэ. Өдөр нэг, хоёрдугаар хоолоо цай эсвэл жимсний шүүсээр даруулна. Унтаж босч ирээд нимгэн гэгч нь масло түрхсэн зүсэм талх эсвэл нэг ширхэг цайны боов аяга цайтай иднэ дээ. Энэ бүхэн нийлээд 1650 төгрөг болдог аж. Гэтэл цэцэрлэгийн хүүхдүүдийг томчууд бид тэр дундаа саарал байшинд байгаа манай дарга нар өлсгөдөг бололтой. Өнөөдөр манай аймгийн 20 гаруй цэцэрлэг 140, 280 хүүхдийн хүчин чадалтай. Булаг багт байгаа 100 хүүхдийн цэцэрлэгийг эс тоовцол. Бодит байдал дээр 140 хүүхдийн цэцэрлэг 200 хүүхэдтэй, 280 хүүхдийн цэцэрлэг 350-360 хүүхэдтэй байгаа. Харин хүүхдийн хоолын мөнгийг улсаас бодохдоо албан ёсны тоо буюу 140, 280-аар нь боддог бололтой. Дээр нь өнгөрсөн жил манай аймгийн дарга нар цэцэрлэгийн хүрэлцээ хангамжийг огцом нэмэгдүүлж “Оюу”, “Дэгдэээхий”, “Бялзуухай” гэсэн гоё нэртэй цэцэрлэг байгуулан 1000 шахам хүүхэд цэцэрлэгт хамруулсан. Үүний үр дүнд аймгийн Засаг дарга Г.Зоригт Боловсролын сайд С.Гантөмөрөөс “Боловсролд ээлтэй Засаг дарга” өргөмжлөл хүртсэн. Тэгвэл өнөөдөр цэцэрлэгийн багачуул Г.Зоригт даргын тэрхүү өндөр нэр хүнд бүхий өргөмжлөлийг хувааж идэх дээрээ тулаад байна. Дээрх гурван цэцэрлэгт хамрагдсан 1000 шахам хүүхдийн хоолны мөнгө улсын төсөвт суусан ч юм шиг суугаагүй ч юм шиг мэдээллийг Нутгийн удирдлагийн ордноос өгч байна. Өөрөөр хэлбэл, цэцэрлэгт хамрагдах хүүхдийн тоог нэмж иргэдээс оноо цуглуулахаа бодсоноос биш тэр бяцхан “амьтад” хоол иддэг гэдгийг мартсан бололтой, манай аймгийн дарга нар. Энэ сарын 29-нд аймгийн захиргааны хоёр давхарт цэцэрлэгийн эрхлэгч нар цуглаад бодит байдлаа Засаг даргад танилцуулах гээд сууж байсан удаатай. Тэд аймгийн Боловсролын газар, Санхүү төрийн сангийнханы хоорондын үл ойлголцлоос болоод өнөөдөр хүүхдүүд хохирч байна, өлсөж байна. Ирэх сард хүүхдүүдэд ямар мөнгө, хөрөнгөөр хоол унд авч өгөхөө мэдэхгүй байна хэмээн аргаа бараад Засаг ноёндоо бараалхах болсноо дуулгасан. Энэ жил бас нэгэн цэцэрлэг шинээр ашиглалтад орно. Эцэг эхчүүдийн хувьд хүлээлт үүсгээд байгаа “Одод” цэцэрлэг өнөөдөр санхүүжилтгүй учраас ажиллахгүй байгаа. Цэцэрлэгийнхээ хүүхдийн хоолны мөнгө, сурган хүмүүжүүлэгчид болон туслах багш нарын илүү цагийн мөнгийг шийдэж чадалгүй хоёр жил болж байгааг дарга нар мэдмээр сэн. Өнгөрсөн жил Ерөнхий сайд Н.Алтанхуяг манай аймагт ажиллаж, аймгийн Захиргааны хурлын том танхимд дарга нартай уулзаж байхдаа Сангийн яамны нөхөдтэй яриад цэцэрлэгийн багш нарын илүү цагийн мөнгийг бараг л газар дээр нь шийдсэн. Гэтэл өнөөдөр хүртэл багш нарын илүү цагийн мөнгө асуудалтай байдаг аж. Үүнээс ч долоон дор нэгэн хэрэг манай аймагт мандсан. Дарга нар цэцэрлэгийн хүүхдүүд өргөдөл бариад ороод ирэх биш, тэд ямар 70353511 утас руу залгаад цэцэрлэгтээ явмаар байна гэж хэлж чадах биш гэж бодоод машиндаа суугаад манаргаж явна. Өнгөрөгч 10 дугаар сарын 1-нд Их залуу багийн нутагт байх 23 дугаар цэцэрлэгийн уурын зуухны тогоо дэлбэрээд өнөөдрийг болтол тус цэцэрлэгийн хүүхдүүд албандаа явж чадахгүй “гэрийн буг” болж байна. Зарим эх сурвалжийн хэлж байгаачлан уурын зуухны ажилчид нь архидаж байгаад тогоогоо дэлбэлсэн бололтой. Аймгийн захиргаанаас 14 хоногийн дотор засварлах “баг” гаргаж хөрөнгө мөнгийг нь шийджээ. Дарга нар өгсөн үүрэг даалгавраа эргэж шалгадаггүй учраас нөгөө засварын ажил нь өнөө хэр дуусаагүй, Их залуу багийн хүүхдүүд цэцэрлэгтээ явж чадахгүй нэг сар боллоо. Гэтэл энэ хооронд манай аймгийн зарим нэг томоохон дарга нар гадаадад 1-2 удаа яваад амжжээ. 23 дугаар цэцэрлэг хэзээнээс хэвийн ажиллах талаар мэдэх хүн өнөөдөртөө л лав манай аймагт алга. Болохгүй бол эцэг эхчүүд яаманд хандахаас гэж сууна. Цэцэрлэгт явдаг нь хоолондоо цадахгүй өлсөөд цэцэрлэгтэй байсан зарим нь уурын зуухныхаа аманд багтчихаад аргаа барьж байхад аймгийн Захиргааны зарим нэг дарга нар жилдээ 9 сая төгрөгийг түлш шатахуун нэрээр шатааж байгааг “ардчилал” гэдэггүй байлтай. Цэцэрлэгийн багачуул хоолондоо цадахгүй өлсөж байна, Г.Зоригт дарга аа. Н.ТӨР