Ийм мэдээлэл хэд хоногийн өмнөөс Нутгийн удирдлагын ордон болоод Ардчиллын цэнхэр байраар “нисч” байсан. Орхон аймгийн 100 гаруй мянган иргэн бүхий хөлөг онгоцны “капитан” нь болох Г.Зоригт даргын суудал буюу аймгийн Засаг даргын сэнтийн төлөөх тулаан манай аймгийн ИТХ-ын олон фракц, бүлгийн хэмжээнээс хальж төрийн ордон хавиар хүчээ авч эхэлжээ. Баттай эх сурвалжийн өгүүлсэнээр энэ сарын 25-нд хуралдах аймгийн ИТХ-ын ээлжит хуралдаанаар Орхон аймгийн Засаг дарга Г.Зоригт эрүүл мэндийн шалтгаанаар өргөдлөө өгч дараагийн хүнд тамгаа гардуулах нь тодорхой болсон байна. Тэгвэл дараагийн Засаг дарга хэн байх вэ гэдэг яриа, таамаг дуулдаж зарим нэг даргын хэнээтэй нөхдүүд ядаж л өөрийнхээ нэрийг нэр дэвшигчдийн дунд оруулчих санаатай чанга дуугарахаар төлөвлөж байгаа бололтой. Орхон аймгийн шинэ Засаг даргаар хэн тодрохыг Монгол улсын Ерөнхий сайд мэдэх гэхээсээ илүүтэй намын дарга З.Энхболдын амнаас гарах үг л шийдэх болов уу. Энэ талаас нь харвал аймгийн Засаг даргын орлогч Д.Энхбат, ИТХ-ын дарга Б.Мягмарсүрэн гээд аймгийн АН-ын одоо цагийн “лидерүүд”-эд энэ удаа арай л хуруу дутах болов уу. Тэгээд ч дээрх эрхмүүдийг нам, ИТХ-ын бүлэг дэмжинэ гэдэгт эргэлзэх шалтгаан хангалттай байгаа гэнэ. Харин зарим нэг “мессеж”-ээр бол “Эрдэнэт үйлдвэр”-ийн томоохон дарга нараас Орхон аймгийн дараагийн Засаг даргаар тодрох тухай яриа гарч байгаа. Ямар ч байсан бидэнд байгаа мэдээллээр аймгийн Засаг дарга Г.Зоригт ажлаа өгөх нь тодорхой болж, Орхон аймгийн АН-ын дотор хэнийг дараагийн Засаг дарга болгох вэ гэдэг “марафон” аль хэдийнэ эхэлжээ. Засаг дарга Г.Зоригт Ерөнхий сайд, намын дарга нартайгаа уулзахаар өнөөдөр нийслэлийн зүг хүлгийн жолоо залжээ.