Орхон аймгаас сонгогдсон УИХ-ын гишүүн О.Содбилэг тойрогтоо гурав хоногийн хугацаатай ажиллаж байна. Тэрээр ажлын эхний өдрөө “Эрдэнэт цогцолбор” сургуулиас эхэллээ. Тус сургууль гурван ээлжээр хичээллэдэг улсын хэмжээний хамгийн ачаалалтай 22 сургуулийн нэг юм. 2012 оны УИХ-ын сонгуульд Орхон аймгийн сонгогчдын дийлэнх олонхийн саналыг авч сонгогдсон О.Содбилэг гишүүн энэ удаад тойрогтоо тодорхой хөтөлбөрийн дагуу ажиллаж байна. Тэрээр өөрийн суралцаж байсан “Эрдэнэт цогцолбор” сургуулийн хоёр ангид 40 ширээ, 80 сандал бэлэглэсэн батламжаа энэ үеэр гардууллаа. Улсын хэмжээнд гурван ээлжээр хичээллэдэг 22 сургууль байдгийн нэг нь тус сургууль юм. Гишүүний хувьд сургуулийн захиргааны хүсэлтийн дагуу холбогдох газарт нь анхаарч ажилласны хүчинд энэ оны төсөвт тус сургуулийн өргөтгөл барих ажлын эхний төсөв болох 2 тэрбум төгрөг батлагдсан. Хятадын Засгийн газрын 100 хувийн хөрөнгө оруулалтаар босох уг сургууль 1-р сургуулийн хашаан дотор баригдах юм. Шинэ сургуультай болсноор одоо ашиглаж байгаа бага сургуулиа цэцэрлэгийн зориулалтаар ажиллуулах боломж байгааг сургуулийн удирдлага ярьлаа. “Эрдэнэт цогцолбор” сургууль өнгөрсөн жил 40 жилийн ойгоо тэмдэглэсэн, зургаан гавьяат багш төрүүлсэн, “Алтан гадас” одонт сургууль юм. Тус сургууль гурван ээлжээр хичээллэж, сурагчдын эрүүл аюулгүй орчинд суралцах боломж тааруу байсаар ирсэнийг багш нар ярьлаа. Иймд шинэ сургууль баригдах асуудал улс орны санхүү хүндрэлтэй байгаа үед шийдэгдсэнд баярлаж байсан юм.