Орхон аймгийн шинэхэн Засаг дарга С.Дангаасүрэн анхны Засаг даргын шуурхай зөвлөгөөнөө хийлээ. Шуурхай зөвлөгөөнд аймгийн ИТХ-ын дарга Б.Мягмарсүрэн оролцож, Монгол улсын Ерөнхий сайдын батламжилсан Засаг даргад захиа даалгавар өгч, “Арслан мэт ноёныг барс мэт түшмэл дагана” хэмээн сургаалийн үг хэлсэн нь олон хүний анхаарлыг татсан төдийгүй нутгийн өөрөө удирдах ёсны байгууллага гүйцэтгэх засаглалын ажилд хөндлөнгөөс хэт оролцох гээд байгаа мэт байдал илэрхийлсэн үйлдэл боллоо. Орхон аймгийн 11 дэх Засаг дарга С.Дангаасүрэнгийн удирдсан анхны шуурхай зөвлөгөөнд хэлтэс, агентлагийн дарга нар зуун хувийн ирцтэй оролцов. Хурлын эхэнд аймгийн ИТХ-ын дарга Б.Мягмарсүрэн орж ирэн Засаг дарга С.Дангаасүрэнд хариуцлагатай,шуурхай, ил тод ажиллахыг үүрэг болгож, захиас даалгавар өгсөн маягтай үг хэлэв. Энэхүү аймгийн даргад хандсан захиас үгийг Б.Мягмарсүрэн дарга гурав дахь удаагаа хэвлэл мэдээллийн хэрэгслийн өмнө хэлж байгаа юм. Анх С.Дангаасүрэнг Засаг даргаар томилсон аймгийн ИТХ-ын хуралдаан дээр, дараа нь өнгөрсөн баасан гаригт шинэхэн Засаг даргад тамга гардуулах үеэр, харин өнөөдөр гурав дахь удаагаа аймгийн шуурхай зөвлөгөөн дээр өөрийн биеэр орж ирэн хэлсэн юм.            Нутгийн өөрөө удирдах ёсны байгууллага аймгийн Засаг даргыг сонгож, баталдаг боловч, иргэдийн хурал дээр анхааруулсан санал бодлоо чөлөөтэй илэрхийлэх нь зөв. Гэсэн ч ийнхүү дахин дахин нэхэл хатуутай олон нийтийн өмнө ярьсаар байгаа нь анхаарал татсан төдийгүй гүйцэтгэх байгууллага болох амгийн Засаг даргын тамгын газрын ажлыг хянах ёстой хурлын байгууллага эрх мэдлээ хэтрүүлээд байх шиг сэтгэгдлийг олон хүнд төрүүлсэн. Ялангуяа үгийнхээ төгсгөлд Б.Мягмарсүрэн даргын хэлсэн “Арслан мэт ноёныг барс мэт түшмэл дагана” гэсэн учир битүүлэг үг хурлын зааланд суусан хүмүүсийг гайхахад хүргэсэн. Ийнхүү Орхон аймгийн төр захиргааны түүхэнд хурлын байгууллага нь Засаг даргын шуурхай зөвлөгөөн дээр урилгагүй орж ирэн учир битүүлэг үг унагаж буй анхны үйлдэл болсон гэхэд буруудахгүй. Дээрх санаатай хэлсэн учир битүүлэг үгний утгыг хүмүүс өөр өөрийнхөөрөө дүгнэнэ, үүний цаана бүхнийг эрх мэдлээрээ далайлгаж дарах гэсэн аймгийн ИТХ-ын даргын бодлого үгээр нь дамжин гарсан гэхэд болно. Л.Гэрэл