Өнөөдөр хуралдсан аймгийн ИТХ-ын ээлжит бус хуралдаанаар Орхон аймгийн төсвийн нэмэлт тодотголыг хэлэлцсэн. Өнгөрсөн оны арванхоёрдугаар сарын 15-наас хойш Засаг даргагүй байсан Орхон аймгийн хувьд өнөөдрийн баталсан нэмэлт төсөв төрийн байгууллага, нийгмийн халамж, тэтгэвэр тэтгэмж хүртэгсэдийн гол амин тариа болж байна. Аймгийн Засаг дарга С.Дангаасүрэн 2015 оны орон нутгийн төсвийн нэмэлт тодотголыг танилцуулсаны дараа аймгийн ИТХ-ын төлөөлөгчид төсөвтэй холбоотой асуудлаар асуулт асууж, хариулт авлаа.  Энэ удаагийн төсвийг хэлэлцэх үеэр шүүмжлэл дагуулсан сэдэв бол “Эрдэнэт сан”-гийн хөрөнгийг зарцуулахдаа аймгийн ИТХ болон Тэргүүлэгчдээр хэлэлцүүлэлгүйгээр захиран зарцуулсан явдал байсан. “Эрдэнэт сан”-гаас нийтдээ 335 сая төгрөгийг батлуулалгүйгээр зарцуулаад дараа нь аймгийн ИТХ-д оруулж ирсэнийг цөөнхийн бүлгийнхэн эсрэгүүцэж байсан. Аймгийн Засаг даргаар саяхан томилогдсон С.Дангаасүрэн даргын хувьд уг төсвийн төслийг боловсруулахад богино хугацаанд ажилласан боловч засаг даргын нөөц санд хуваарилагдсан хөрөнгийг зарцуулах задаргааг нарийвчлан гаргасан байлаа. Улс орон даяар санхүүгийн хүндрэлтэй хүндрэлтэй байгаа энэ үед Орхон аймгийн нэмэлт төсөв төрийн байгууллагын шатахууны зардал болон бусад урсгал зардлыг танасан. Харин бүтээн байгуулалт руу илүү хөрөнгө оруулахыг хичээсэн бүтээлч, ажил хэрэгч төсөв болж байгааг зарим нэг төлөөлөгчид онцолж байсан. Аймгийн МАН-ын бүлгийн хувьд энэ удаагийн төсвийн үрэлгэн байдлыг багасгаж, 2 тэрбум  төгрөгөөр хасах саналыг гаргасан. Цөөнхийн бүлгээс 10 минутын завсарлага авсаны дараа 2015 оны орон нутгийн төсвийн нэмэлт тодотголыг батлах боломжгүй гэдгээ илэрхийлж, хурлыг орхиж гарсан. Энэ үеэрээ хэвлэлийн бага хурал зарлаж, мэдээлэл хийсэн юм. Орлогоо өөрөө бүрдүүлдэг Орхон аймгийн хувьд санхүүгийн хямралтай энэ үед ч боломжийн хэмжээний хөрөнгө оруулалттай, бүтээн байгууллттай төсвийг 20 гаруй тэрбум төгрөгөөр баталсан юм. Тухайлбал, аймгийн шилжих үлдэгдэл 12 тэрбум, орон нутгийн хөгжлийн сан нэгтэрбум 800 сая, орон нутгийн орлого 2,6 тэрбум, “Эрдэнэт сан” 770 сая, байгаль хамгаалах зардал 556 сая, авто замын санд 670 сая төгрөгийн нэмэлт төсөв баталлаа. Ийнхүү Орхон аймгийн хувьд татвараа өөрөө бүрдүүлдэг цөөхөн аймгийн хувьд улсын төсвийн хөрөнгө оруулалтыг харалгүй 20 гаруй тэрбум төгрөгөөр нэмэлт төсөвөө баталсан цөөхөн баян аймгийн нэг болж байна.