“Хэлж ирдэггүй, хийсч ирдэг” гал түймэр, осол аваарын үед хэрэглэдэг 52 метрийн өндөр буюу орон сууцны 16 давхарт хүрдэг өндрийн сунадаг гүүрийг Орхон аймгийн Онцгой байдлын газарт хүлээлгэн өглөө. Шадар сайдын зөвлөх Д.Дамба-Очир, ОБЕГ-ын дарга Т.Бадрах нар өнгөрсөн баасан гаригт манай аймагт ирж, энэхүү автомашиныг дагалдах хэрэгслийн хамт гардуулсан юм. Хүн амын төвлөрөл ихтэй, өндөр барилга олноор баригдаж буй манай хотод нийслэлд ганцхан ашиглаж байсан уг техникийг өгсөн нь цагаа олсон ажил болсныг аймгийн удирдлагууд онцоллоо. Өндөр барилга өөд 52 метрийн өндөрт сунаж ажиллах хүчин чадалтай уг хэрэгслийн өртөг нь 800 гаруй сая төгрөг юм. Ховорхон, эрэлт хэрэгцээтэй уг техникийг манай аймагт оруулж ирэхэд сэтгэл гаргасан Шадар сайдын зөвлөх Д.Дамба-Очир, ОБЕГ-ын дарга Т.Бадрах нар Эрдэнэтийн унаган иргэд юм.