Захиргааны гуравдугаар байранд байх Байгаль орчин ногоон хөгжлийн яамны харьяа “Сэлэнгэ голын сав газрын захиргаа”-ны даргаар МАН-ын гишүүн, аймгийн НАМЗХ-ны тэргүүн Б.Дашравдан томилогдоод байгаа. Өнгөрөгч баасан гарагт яамнаас комисс ирж тус газрын дарга асан Г.Бат-Эрдэнэийн ажлыг хүлээлцэхээр болжээ. Гэтэл дарга асан Г.Бат-Эрдэнэ байгууллагынхаа тамга, тэмдгийг аваад утсаа салгаад “сураггүй болсон” ажээ. Яамныхан ч хүлээж цөхрөөд аргагүйн эрхэнд нийслэлийн зүг хүлгийн жолоо залсан аж. “Сэлэнгэ голын сав газрын захиргаа”-ны ажилчдаас даргынх нь талаар асуухад мэдэх хүн гарсангүй тул арга буюу “Г.Бат-Эрдэнэ тамгаа аваад зугатжээ” гэсэн дүгнэлт хийсэн гэнэ. Гэтэл ганц нэг хоногийн дараа Г.Бат-Эрдэнэ шинээр томилогдсон дарга Б.Дашравдангийн зүг утас цохиж “Ахын дүү жаахан хүлээчих, тэгэх үү. Манай намын 15 жилийн ой энэ өдрүүдэд тохиож байна. Ойн үеэр би ямар ажлаасаа халагдчихлаа гээд ажил, албан тушаалгүй зогсож байлтай биш. Ойн арга хэмжээ өнгөрөөгөөд ах нь ажлаа өгье” хэмээн учирласан бололтой. Эндээс харвал нэгдүгээрт, дарга асан Г.Бат-Эрдэнэ ямар ч байсан тамга, тэмдгээ аваад зугатаагүй болох нь харагдана. Хоёрдугаарт, “Сэлэнгэ голын сав газрын захиргаа” гэх сайдын шууд мэдэлд байдаг энэ байгууллагын удирдлагад Засгийн газарт багтсан намуудын улс төрийн ажилтнуудын дамжин өнгөрөх бааз газар болох нь харагдана. Үүгээр ч зогсохгүй энэ байгууллагын дарга болсон эрхмүүд намын гишүүнчлэлээсээ татгалздаггүй намдаа заавал сэтэр зүүсэн эрхмүүд байх ёстой гэсэн “бичигдээгүй дүрэм” энд үйлчилдэг юм байна гэж ойлгогдохоор. Мөн энэ байгууллагын дарга бол улс төрийн албан тушаалтан байх ёстой гэсэн ойлголт төрж байна. Ямар ч байсан өнөө маргаашгүй “Сэлэнгэ голын сав газрын захиргаа”-ны даргаар сайдын тушаалаар томилогдсон Б.Дашравдан ажлаа авах нь тодорхой болжээ.