Аймгийн Засаг даргын зөвлөлийн хурлаар Нийгмийн халамж үйлчилгээний хэлтсийн дэргэдэх Ахмадын амралтыг амралт-сувилал болгон өөрчлөх талаар хэлэлцлээ. Нийгмийн халамж үйлчилгээний хэлтсийн дэргэдэх ахмадын амралтыг Амралт-сувилал болгон өөрчлөх болсон үндэслэл нь БОЭТ-ийн ахмадын кабинетээр жилд дунджаар 3800-4400 гаруй, сард, 300-400 ахмад үйлчлүүж үзлэг оношлогоо, зөвлөгөө авч байна. Эдгээрээс жилд 1400-1800, сард 120-150 гаруй ахмад БОЭТ-ийн дотрын тасагт хэвтэн эмчлүүлдэг.  Хэвтэн эмчлүүлж байгаа ахмадуудын 70-80 хувь нь зүрх судасны болон архаг хууч өвчтэй байдаг. Эмнэлэгт яаралтай хэвтэн эмчлүүлэх шаардлагагүй нөхөн сэргээх эмчилгээ, сувилгаа хийлгэх ахмадууд цөөнгүй байдаг. Нөхөн сэргээх эмчилгээ шаардлагатай ахмадууд БОЭТ-ийн дотрын тасгийн орны ачаалалыг нэмэгдүүлж, орны хүлээгдэл үүсгэсэнээр ахмадуудын хувьд бухимдал үүсэх нөхцлийг бүрдүүлж байгаа юм. Иймд одоо байгаа ахмадын амралтыг түшиглэн ахмадуудыг их эмчийн өдөр тутмын хяналт дор эрүүл мэндийн үзлэгт оруулан нөхөн сэргээх, сэргээн засах тусламж үзүүлэх, сэтгэл заслын зөвлөгөө өгөх боломжтой юм. Энэхүү асуудлаар аймгийн Засаг даргын зөвлөлийн хурлаар аймгийн удирдлагууд болон хэлтэс байгууллагуудын удирдлагууд хэлэлцэн ахмадын амралтыг Амралт-сувилал болгох нь зүйтэй гэсэн шийдвэрийг гаргалаа. Ахмадын амралт нь нэг ээлжиндээ 25 хүн амраах хүчин чадалтай. Өмнө нь нэг амрагч өдрийн 4000 төгрөгөөр 10 хоногт 40,000 төгрөгөөр амардаг байсан. Тэр үед амралт дүүргэлтийн хувьд ачаалал ихтэй байсан бол одоо нэг амрагч өдрийн 8000 төгрөгөөр амардаг болсноор ачаалал харьцангуй багасчээ. Харин одоо ахмадын амралтыг Амралт-сувилалын газар болговол ахмадууд амрах нь нэмэгдэж, дүүргэлтийн хувьд хангалттай болно гэж албаныхан үзэж байна. Ингэхийн тулд шаардагдах тоног төхөөрөмж болон шинээр дөрвөн ажлын орон тоо нэмэх шаардлагатай болж байгаа юм. Мөн Амралт сувилалын газар болгон өөрчилснөөр амрагчдын ор хоногийн төлбөр нэмэгдэхгүй, бусдын туслалцаагүй өөрийгөө аваад явах чадвартай амрагчдаас гадна сэргээн засах эмчилгээ хийлгэх шаардлагатай амрагч амрах боломж бүрдэнэ. Мөн ахмадын сэтгэл ханамж сайжирна, БОЭТ-ийн дотрын тасгийн ачаалал багасна зэрэг олон талын ач холбогдолтой юм. Б.Рэнцэнханд