Вьетнамд өрнөсөн Хятадыг эсэргүүцэгчдийн хөлд жирийн иргэд чамгүй ихээр хохирчээ. Тус улсад бизнес эрхэлж буй иргэдийнхээ амь нас, аюулгүй байдлыг хангахын тулд Хятадын Засгийн газраас тусгайлан анхаарч арга хэмжээ авч эхэлжээ. Тэд Вьетнамаас явахыг хүссэн хүмүүстээ зориулан тусгай нислэг гаргаж, усан онгоц илгээсэн байна. Одоогоор 3000 шахам хүнийг эх оронд нь буцааж авчраад байгаа гэнэ. Эзэмшил газар нутагт нь халдаж усан доогуур газрын тосны хайгуулын өрөмдлөг хийхээр шийдсэн Бээжингийн бодлогод дургүйцлээ илэрхийлсэн жагсаал цуглаан Вьетнам даяар өрнөсөн. Жагсаал цуглаан нь эцэстээ халдлага болж   гадаадынхны эзэмшилд байдаг газрууд олноор өртөж байгаа юм. Үндэсний үзэлтнүүд хятадуудын ажиллуулдаг үйлдвэр, үйлчилгээний газарт халдаж, эвдэн сүйтгэх ажиллагаа явуулсан бөгөөд үүний улмаас хоёр хүн амиа алдаж, 100 гаруй хүн гэмтэж бэртжээ. Гэхдээ ганц хятадууд ч биш тайвань, өмнөд солонгос эзэдтэй газруудыг ч эвдэж сүйтгэсэн хэрэг гарчээ. Өмнөд Хятадын тэнгист ч хоёр улсын цэргийн хөлөг онгоцууд бие биенийхээ зүг онилсон, гал нээхэд бэлэн  байгаа гэнэ. Өнгөрсөн бямба гаригт Вьетнамын Засгийн газраас хүч хэрэглэхийн эсрэг байгаагаа илэрхийлж, асуудлыг эв зүйгээр зохицуулахын төлөө анхаарч буй учраас эсэргүүцэгчдийг халдлага үйлдэхгүй байхыг уриалсан байна. Тэд Хятадын эсрэг өрнөсөн иргэдийн хөдөлгөөн гадны хөрөнгө оруулагчдыг үргээх вий гэдгээс ихээхэн болгоомжилж байгаа гэнэ.