“Germanwings” компанийн Airbus А-320 онгоц /III.24/ -нд Францын нутаг дэвсгэрт Альпийн нурууны ойролцоо осолдсон харамсалтай хэрэг гарсан билээ. Онгоцны ослыг мөрдөх Францын товчооныхон онгоцны нэг хар хайрцгийг шинжлэн үзсэн юм. Ингээд онгоц сүйрэхийн өмнө нэг нисэгч нь бүхээгээсээ гарч эргэн орж ирэх үйлдэл хийж байсан нь тогтоогдсон байсан. Тодруулбал онгоцны бүхээгийн гадна байсан хүн хаалгыг нь тогшиход хариу өгөөгүй бөгөөд тэр дахин тогшсон ч хариу өгөөгүй ажээ. Түүнчлэн Финляндын Тээврийн аюулгүй байдлын агентлагийн шинжээч Пекка Хентту нисэгчдийг онгоц сүйрэх үед ухаангүй байсан гэх таамаглал гаргасан билээ. Тэгвэл онгоцны сүйрсэн шалтгаан урьдчилсан байдлаар гарлаа. Тодруулбал осолдсон онгоцны туслах нисгэгч Андрес Любиц онгоцыг санаатай сүйрүүлсэн гэх дүгнэлт гарсан байна. Марсель хотынПрокурор Брайс Робины мэдээлснээр, онгоцны ахмад бүхээгээс гарч яваад эргэж орохыг оролдсон боловч хаалга түгжээтэй байсан төдийгүй, бүхээгт ер бусын чимээгүй байсан. Мөн агаарын тээврийн хянагч онгоцтой холбоо тогтоохыг оролдсон боловч амжилтгүй болсон бөгөөд онгоц сүйрэхийн өмнө зорчигчид хашхирч байгаа нь хар хайрцагны бичлэгт бичигдэж үлдсэн гэж Брайс Робин мэдэгдсэн байна. Дашрамд дурдахад осолдсон онгоцны бүхээг хуягласан хаалгатай байсан ба хаалганы хажууд видео камер байрлуулсан байжээ. Энэ нь бүхээгт орох гэж байгаа хүнийг хэн бэ гэдгийг нь тогтоодог ба хаалгыг зөвхөн бүхээгт байгаа нисэгч дотроос нь онгойлгох боломжтой аж. Учир нь нисэгчийн бүхээгт зэвсэглэсэн этгээдийг оруулахгүй байх зорилготой бөгөөд аюулгүй байдлын арга хэмжээ гэнэ. Энэ арга хэмжээг АНУ-д болсон есдүгээр сарын 11-ны халдлагын дараа улам сайжруулсан юм байна. Гэхдээ агаарын компаниуд онгоц бүр өөр, өөр байдаг ажээ. Ямартай ч 28 настай Андрес Любиц гэх нисгэгч залуу юуны учир ийнхүү онгоцыг сүйрүүлсэн нь тодорхойгүй байгаа юм. Эх сурвалж: new.mn