УИХ-ын гишүүн асан Л.Гүндалай АН-аас гарч шинэ нам байгуулахаар болсон тухайгаа өнгөрөгч долоо хоногт Улаанбаатарт албан ёсоор зарласан. Тэгвэл “ард Гүндалай” өчигдөр Эрдэнэт хотноо хэвлэлийн бага хурал хийлгэн “Ард түмнээ хайрлая” нэртэй нам байгуулах гэж буйгаа мэдэгдлээ. Ирэх сарын 2-ноос эхлэн Эрдэнэтийн төвд А.Амарын талбай дээр ширээ сандал харшилдуулан байж нам байгуулах эрх авах 801 хүний гарын үсэг цуглуулах аяндаа гарах гэж байгаа аж. Тэгвэл “иргэн Гүндалай”-д 801 хүний гарын үсэг цуглуулах нь тийм ч хэцүү даалгавар биш гэнэ. “Ард түмнээ хайрлая” намын үүсгэн байгуулагч, санаачлагч Л.Гүндалайгийн ард Эрдэнэтийнхэний хамгийн сайн мэдэх “ Зэс эрдэнийн хувь” ХХК-ийн ТУЗ-ийн дарга Д.Алтанхуяг өөрийнхөө компанийн 30 гаруй мянган гишүүний хамт байгаа гэх шуум гарч байна. Улмаар дээрх шинэ нам байгуулагдвал Л.Гүндалайгийн хувьд “Зэс эрдэнийн хувь” ХХК-ийн гишүүдийн дэмжлэгтэйгээр УИХ-ын гишүүн болохоор цээжний тооцоо хийсэн шигээ суугаа бололтой. 2000 оны эхээр “Эрэл” компанийн захирал Б.Эрдэнэбат компанийнхаа нэрээр “Эрэл” нам байгуулж УИХ-ын гишүүний босгыг давсан түүхийг Эрдэнэтэд амьдрал дээр бүтээлчээр хэрэгжүүлэхээр Л.Гүндалай, Д.Алтанхуяг нар “Зэс эрдэнийн хувь” компанийн “Ард түмнээ хайрлая” намыг үүсгэн байгуулж магадгүй гэсэн нэгэн мэдээлэл хөвөрч эхэллээ. Тэгээд ч өнгөрөгч 2012 оны УИХ-ын сонгуулиар эрхэм гишүүн  О.Содбилэг сонгогчдын 40 гаруй хувь буюу 20 гаруй мянган иргэний санал авсан. Л.Цог 12 мянган иргэний санал авч УИХ-ын дэд дарга болсон. “Зэс эрдэнийн хувь” ХХК 30-40 мянган гишүүнтэй гэж тооцогддог. Энэ өнцгөөс нь харвал Л.Гүндалайгийн Д.Алтанхуягтай нөхөрлөх замд ногоон гэрэл асч байна уу.