АНУ-ын Төрийн нарийн бичгийн дарга асан, тэргүүн хатагтай Хилари Клинтон 2016 онд зохион байгуулагдах Ерөнхийлөгчийн сонгуульд Ардчилсан намаас нэр дэвшиж буйгаа албан ёсоор мэдэгдсэн байна. Тэрбээр /IV.12/-нд “NBC” телевизээр дамжуулан “Би албан ёсоор сонгуульд өрсөлдөж буйгаа мэдэгдэж байна. Би үргэлж ялагч байхыг хүсдэг. Надад саналаа өгч, шинэ Америкийн төлөө нэгдэцгээе. Энэ улсыг эмэгтэй хүн удирдах цаг нь нэгэнт болсон” хэмээжээ. Одоогийн байдлаар 2016 оны сонгуульд Кентаки мужийн сенат Рэнд Пол болон Техас мужаас Тэд Круз нар өрсөлдөнө гэдгээ мэдэгдээд байгаа юм. 2008 оны сонгуульд Ардчилсан намаас Хилари Клинтон болон Барак Обама нар өрсөлдөж эцсийн сунгаанд Обама өрсөлдөхөөр шалгарч байсан билээ. Түүнийг сонгуульд өрсөлдөнө гэдгээ зарласны дараа Ерөнхийлөгч Барак Обама “Клинтон Төрийн нарийн бичгийн даргын албыг гайхалтай сайн хашсан. Тэрбээр миний найз нөхдийн нэг. Клинтоныг маш сайн Ерөнхийлөгч болно гэдэгт итгэлтэй байна” хэмээгээд 2016 оны Ерөнхийлөгчийн сонгуульд түүнийг дэмжих болно гэдгээ илэрхийлжээ. Эх сурвалж: new.mn